'अदालतया भ्रष्टाचार पने'
स्वलात्याया लागिं वःम्ह प्रधानन्यायाधीशया बचं
येँ (सन्ध्या टाइम्स)/सर्वोच्च अदालतया न्हूम्ह प्रधानन्यायाधीश अनुपराज शर्मां अदालत दुने जुयाच्वंगु ढिलासुस्ती व भ्रष्टाचार पनेगु निंतिं छवाःया दुने हे थम्हं छगू संयन्त्र दयेकेगु बचं बियादीगु दु ।
थौं थःगु पदया शपथ ग्रहण यायेवं सञ्चारकर्मीतलिसे खँ ल्हासें वय्कलं थ्व प्रतिवद्धता प्वंकादीगु खः। अदालत दुने नं व्यापक भ्रष्टाचार जुयाच्वंगु दु धइगु खँ पिहां वयाच्वंगु इलय् लाक्क वय्कलं अज्याःगु भ्रष्टाचार नियन्त्रण यायेगु लागिं थ्व संयन्त्र दयेकेत्यनागु खँ धयादीगु खः ।
वय्कलं धयादिल, 'अदालत दुने कानून व्यवसायीपाखें भ्रष्टाचार जुयाच्वंगु खःला, वा कर्मचारीपाखें जुयाच्वंगु खःला वा न्यायाधीशतपाखें जुयाच्वंगु खः सीकाः निवारणया लागिं छगू संयन्त्र दयेके वयां लिपा उगु संयन्त्रं गज्याःगु सुझाव बी अज्याःगु हे रणनीति दयेकाः थः न्ह्याः वनेगु जुइ।'
भाजु शर्माया कार्यकाल धाःसा उलि ताःहाकः मदु। उमेर हदबन्दीया कारणं वय्कलं मेगु स्वलात्या लिपा हे अवकाश कयादी। उकिं चीधंगु अवधिया लागिं जक वयाम्ह जूगुलिं थःगुपाखें ततःधंगु आशा मयायेत नं वय्कलं आग्रह यानादिल
।
थौं सुथय् राष्ट्रपति रामवरण यादवं राष्ट्रपति भवन शितल निवासय् वय्कलं पद व गोपनीयताया शपथ ग्रहण यानादीगु खः। भाजु शर्मायात सुधारवादी, उदारवादी व प्रजातन्त्रवादी कानूनविद् कथं कायेगु याः ।
