थनिंनिसें गणराज्य घोषणा

थौं कोचिला व लिम्बुवान गणराज्य घोषणा याइगु

येँ (सन्ध्या टाइम्स)/संविधान सभाय् तःधंगु राजनीतिक पार्टीतय्सं तसकं विरोध यानाच्वंसां नं एनेकपा माओवादीं थनिंनिसें थीथी जातीय नामं स्वनातःगु स्वायत्त गणराज्य घोषणा ज्याझ्वः न्ह्याकेत्यंगु दु ।

माओवादीं न्ह्याकाच्वंगु स्वंगूगु चरणया आन्दोलनया झ्वलय् थनिनिसें पुस ३ गते तकया दुने झिंप्यंगू गणराज्य घोषणा याइगु ज्याझ्वः दु। पूर्वघोषित ग्वसाः कथं थौं पूर्वया कोचिला गणराज्य व लिम्बुवान स्वायत्त गणराज्य घोषणा यायेत्यंगु दु ।

माओवादीं झापा, मोरङ व सुनसरी जिल्ला दुथ्याकाः कोचिला गणराज्य घोषणा यायेत्यंगु खः। झापाया बिर्तामोडय् थौं थ्व गणराज्य घोषणा याइगु ज्याझ्वः दु। उगु घोषणा सभाय् माओवादीया सचिव पोष्ट बहादुर बोगती (दिवाकरं) संवोधन यानादी। अथे हे इलाम, तेह्रथुम, पाँचथर, धनकुटा व संखुवासभा दुथ्याकाः लिम्बुवान स्वायत्त गणराज्य घोषणा यायेत्यंगु दु। थौं हे तेह्रथुमया म्याङलुङग बजारय् थ्व घोषणा याइगु ज्याझ्वः दुसा उगु घोषणा सभाय् माओवादी स्थायी समितिया दुजः नापं संयुक्त राष्ट्रिय जनआन्दोलनया महासचिव नेत्र विक्रम चन्द (विप्लवं) संवोधन यानादी।
थ्व घोषणा ज्याझ्वःयात माओवादीं प्रचारात्मक जक खः धयाच्वंसां घोषणा लिपा अन छु याइगु जुइ धकाः स्थानीय मनूतय् दथुइ धाःसा चिउताः ब्वलनाच्वंगु दु। निगुलिं घोषणास्थलय् व्यापक सुरक्षाकर्मी परिचालन यानातःगु दु।

बन्दय् नेवाः ध्वाँय् मपनेत इनाप

येँ (सन्ध्या टाइम्स)/एनेकपा(माओवादीं) वइगु पुस ५, ६ व ७ गते घोषणा यानातःगु नेपाल बन्दय् नेवाः ध्वाँय् तयाः हइगु गाडी मपनेत नेवाः स्वायत्त राज्य मंकाः संघर्ष समितिं माओवादीयात इनाप याःगु दु ।

मंकाः संघर्ष समितिया नायः नरेन्द्रभक्त हाडाया नेतृत्वय् म्हिगः वंगु छगू पुचलं माओवादीया उपाध्यक्ष नापं संयुक्त राष्ट्रिय जनआन्दोलन नेपालया अध्यक्ष डा. बाबुराम भट्टराईयात नापलानाः थ्व इनाप याःगु खः। वइगु पुस ११ गते नेवाः समुदायं नेवाः राज्य घोषणा यायेत्यनागु जुयाः उकिया निंतिं माःगु प्रचार प्रसार यायेगु ज्या वहे बन्दया इलय् लाइगु जुयाः अबलय् नेवाः ध्वाँय् दुगु गाडीइ पंगः मथनेत इनाप याःगु खः। लिसें सम्भव दुसा पुस १ गते माओवादीं याःगु नेवाः राज्य घोषणा ज्याझ्वः नं ११ गते हे लाकाः मंकाः कथं घोषणा यायेत नं नेवाः न्ह्यलुवातय्सं इनाप याःगु खः। उकियात कयाः माओवादी पार्टी दुने सहलह ब्याकेगु नापं नेवाःतय्सं पुस ११ गते याइगु ज्याझ्वलय् पार्टीपाखें पूर्ण समर्थन यायेगु बचं माओवादी नेतां बियादीगु खः। माओवादीं पुस १ गते स्वनिगःया न्यागू थासय् जुलुस पिकयाः बसन्तपुली मुंसें नेवाः स्वायत्त गणराज्य घोषणा यायेगु ज्याझ्वः दयेकातःगु दु ।