मानव अधिकारया मिखां नेपाः स्वयेबलय्

दँय्दसं १० डिसेम्बर कुन्हु हनीगु विश्व मानवाधिकार दिवस म्हिगः नेपालय् नं हन। थ्वहे लसताय् लाकाः नेपालय् मानव अधिकारकर्मीतय्गु छगू महामुँज्या नं जुलसा दिवस कुन्हु प्रधानमन्त्रीं निसें कयाः सेना व थीथी दलया नेतातय्सं नं भिंतुना सन्देश जारी यात ।

नेपालय् मानव अधिकारया खँ ल्हायेबलय् आः नेतातय्सं जनतायात भिंतुना बीगु छगू बाहेक मेगु छुं यायेफुगु अवस्था नं मदु। देशय् क्रान्ति सम्पन्न जुयाः न्हूगु व्यवस्थापाखे वनाच्वनागु थौंया इलय् सुं नं नागरिकया ज्यान तक हे सुरक्षित मजुयाच्वंगु अवस्थाय् उमिगु मेमेगु अधिकार सुरक्षित जुइमाः धकाः कल्पना यायेगु तक नं अतिशयोक्तिपूर्ण ज्या जुइ थें खनेदु। नागरिकया मानव अधिकार लगातार हनन् जुयाच्वंगु जक मखु मानव अधिकार हनन् याःपिं धकाः पुष्टि जुइधुंकूपिं मनूतय्त तकं कारवाहीया पलेसा पुरस्कृत याइगु परिपाटी देशय् ब्वलनाच्वंगु दु। छखे दण्डहिनतां हे मानव अधिकार हनन्यात प्रोत्साहित याइगु खः धकाः सकस्यां धयाच्वंगु दुसा मेखे मानव अधिकार हनन् याइपिंत संरक्षण व परिपोषण यायेगु ज्याय् राज्य हे लगे जुयाच्वंगु दु। ल्वाभः ज्वनाः सर्वसाधारण मनूतय् म्वायेगु अधिकार हनन् याइपिं थीथी सशस्त्र पुचःतय्त नियन्त्रण याये मफुगुली जक मखु विगतय् मानव अधिकार हनन् याःपिं धकाः राज्यया हे मेगु निकायं प्रमाणित यानातःपिं सेनाया अधिकारीतय्त बढुवाया सिरपाः बीगु ज्याय् तकं राज्य संलग्न जुयाच्वंगु दु। मानव अधिकार हनन्या मिखां स्वयेबलय् थौं नेपाः विश्वया हे दकलय् भयानक मुलुकया धलखय् लानाच्वंगु दु। थ्वपाखें मुक्त जुइगु आशाया जः जक लुइकेफुसां थ्व दिवस हनाया सार्थकता दइगु जुइ ।

More Stories Like this