समाधान मालेत मेगु कार्यदलया कुतः

राजनीतिक गतिरोध चीकेगु लागिं तःधंगू स्वंगू दल जानाः हानं मेगु छगू कार्यदल दयेकूगु दु। कार्यदलं गतिरोधया निकास मालेगु लागिं निन्हु तक बैठक च्वनाः छुं छुं उपायत लुइकेगु कुतः याःगु दु। थ्वहे कार्यदलं निकास लुइकाः देशय् कायम जुयाच्वंगु तनाव मदयेका बी धकाः आशा यायेगु थाय् धाःसा अझ नं मवःनि। अथे खःसां न्हापा न्हापाया कार्यदलं छु छु कारणं समाधान पिकाये मफुगु खः धइगु खँयात समेत अध्ययन यानाः थ्व कार्यदलं पलाः न्ह्याकी धाःगुलिं थुकिं छुं उपाय लुइकीगु खः ला धकाः आशा ब्वलंका बिउगु दु।
समस्या आः थुलि स्वतुमतु स्वयेधुंकल कि देय्या धाथेंया समस्या छु खः धकाः हे आः तिफ्याये मफुगु अवस्था वयाच्वंगु दु। राजनीतिक पार्टीया नेतातय्सं धायेगु याः, यदि चाहे जुल धाःसा थ्व समस्यायात निघौया दुने समाधान यायेफु। तर समाधानया लागिं बैठक च्वनीबलय् धाःसा वहे नेतातय्सं उपाय लुइकेगु लँपुइ पंगः थनाच्वंगु दइ। वास्तवय् थ्व निघौ छु निगू मिनेटं समाधान यायेफुगु विषय खः। थ्व गनं समस्या दयाः हे समस्या जुयाच्वंगु विषय मखु। केवल राजनीतिक पार्टीया नेतातय् पाखण्डपूर्ण अडान व महत्वहीन तर्कं यानाः जक थानाच्वंगु समस्या खः। आः गठन जूगु कार्यदलं थःगु पार्टी व थःगु पार्टीया नेतातय्के दुगु थ्व समस्यायात थुइकाः समाधान मालेगु ज्या यात धाःसा उकिया च्वः नं अवश्य लुइ जुइ। यदि अथे मजुसे नेतातय्सं धाःधाः थे हे जक अडान तयाः समाधान मालेगु कुतः यात धाःसा थ्वं याइगु मेहनत नं लखय् बाः वनीगु सिबाय् मेगु छुं जुइ फइ मखु। थुलि खँ ला झीसं आः हे धया तयेफु ।

More Stories Like this