'न्हूगु संविधान मवयेफु'
निलाम्बर आचार्यपाखें दलतय्त ख्याच्वः
येँ (सन्ध्या टाइम्स)/ संविधानसभाया संवैधानिक समितिया अध्यक्ष निलाम्बर आचार्यं राजनीतिक पार्टीतय् दथुइ आः थेंज्याःगु हे सम्बन्ध कायम जुयाच्वन धाःसा जेठं न्हूगु संविधान तयार जुइ मखु धयादीगु दु। म्हिगः बीबीसी नेपाली सेवालिसे खँ ल्हासें वय्कलं थ्व खँ धयादीगु खः ।
संविधान तयार यायेगु लागिं अझ नं न्यालात्या ई दनि, उकिं मेहनत यात धाःसा थुलि ईया दुने संविधान तयार जुइफु धासें तर राजनीतिक पार्टीतय् दथुइ थौंकन्हय् थेंज्याःगु हे सम्बन्ध कायम जुयाच्वन धाःसा न्यालात्याया दुने न्हूगु संविधान मवइगु ठहर नं वय्कं यानादीगु दु ।
संविधान तयार यायेगु धकाः ज्या न्ह्याःसां नं आः थेंज्याःगु बन्द, हडताल, संसद अवरुद्ध यायेगु ज्या धाःसा जुइ मजिउगु खँ नं वय्कलं कनादिल ।
'दलतय् दथुइ थौंकन्हय् तसकं स्वापू स्यनाच्वंगु दु। उमिसं थःपिनि दथुइ समन्वय जक यानां मगाः, सम्बन्ध हे सुधार यायेमाः। अथे जूसा जक संविधान वइ, मखुसा वइ मखु।' वय्कलं धयादिल ।
