सरकार-सेना तनाव

उजं लिपा नं सेना भर्ती ज्या जारी

नेपाली सेनाया थीथी तहलय् प्वनाच्वंगु स्वद्वःगू पदय् पदपूर्ति यायेगु ज्या जारी हे जुयाच्वंगु खँ सीदुगु दु । निला न्ह्यः न्ह्याःगु सेना पदपूर्ति सम्बन्धी थ्व ज्यायात माओवादी व अनमिनं समेत सम्झौता विपरित खः धासें आपत्ति प्वंकूगु खः । वयां लिपा रक्षा मन्त्रालयं नेपाली सेनायात औपचारिक रुपं हे न्हूगु भर्ना सम्बन्धी ज्या दिकि धकाः निर्देशन बिउगु खः । तर नेपाली सेनां धाःसा प्वनाच्वंगु थासय् पदपूर्ति यायेगु ज्या सम्झौता व नियम अःखः मखु धासें संविधान कथं हे थ्व ज्या यानाच्वनागु दावी याःगु दु ।

थ्यंमथ्यं निला न्ह्यः सेनां सहायक पण्डितंनिसें हुद्दा जवान व फलोवस्रया निंतिं २९०० म्ह जवानआवश्यक जूगु विज्ञापन पिकाःगु खः । आः उकिया लागिं मनू ल्ययेगु ज्या न्ह्यानाच्वंगु खः । उगु विज्ञापन कथं
न्यय्द्वः मनुखं दरखास्त तःगु खः ।

सरकारपाखें थ्व इलय् सेना भर्ती यायेगु पाय्छि मखु धासें थ्व ज्या दिकेत सेनायात औपचारिक रुपं हे निर्देशन बिउगुलिं आः सेनां छु याइ धकाः मनूतय् ध्यान वनाच्वंगु दु । थुकिया नापनापं अनमिनपाखें नं थ्व इलय् सेना भर्ती यायेगु लागिं शान्ति सम्झौताया अःखः जुइ धासें नेपाली सेनायात छगू औपचारिक पौ हे लःल्हायेधुंकूगु दु ।

नेकपा माओवादीया डेपुटी कमान्डर वर्षमान पुन अनन्तं थ्व बारे थःपिनि प्रतिक्रिया बिसें नेपाली सेनाया
पदपूर्ति यायेगु ज्यायात सम्झौतां निषेधित यानातःगु खँ कनादिल । वय्कलं धयादिल, 'यदि सेनां नियमित धकाः भर्ना यात धाःसा माओवादी सेनाय् नं न्हू भर्ना सामान्य जुइ ।'

उखे सेनाया थ्व ज्यां यानाः शान्ति सम्झौता प्रभावित जुइफइगु खँ शान्ति तथा पुनर्निर्माण मन्त्री जनार्दन शर्मा प्रभाकरं नं धयादीगु दु । शान्ति सम्झौता कथं निगुलिं सेनां मनू थपे याये मदु धासें
वय्कलं नेपाली सेनां थपे यायेत्यंगु खःसां आः सरकारं अथे मयायेत निर्देशन बीधुंकूगु कारणं सेनाया थ्व ज्या दी धकाः आशा प्वंकादिल । वय्कलं धयादिल, 'सेनां थ्व ज्या मदिकल धाःसा छु यायेगु धइगु खँ हे
जुइ मखु । थ्व ज्या ला वं दिके हे माः ।'

सेना धइम्ह सरकारया मातहत दइगु जूगुलिं वं सरकारी निर्देशन पालना याये हे माः धासें वय्कलं सेनां सरकारी निर्देशनया अवज्ञा मयाइगु बिचाःप्वंकादिल ।

उखे छुं जुयाः सेनां सरकारया निर्देशनयात उल्लंघन यानाः भर्ती प्रक्रिया न्ह्याका हे च्वन धाःसा छु यायेगु धकाः माओवादी दुने सहलह शुरु जूगु खँ नं धाःगु दु ।

विस्तृत शान्ति सम्झौता लिपा नं नेपाली सेनां निकः तक प्वनाच्वंगु पदय् भर्ना कायेधुंकूगु दु । नेपाली सेनां लोकसेवा आयोगया सहभागिताय् दयेकूगु सामान्य सिद्धान्त कथं सेनाय् दँय् प्यक्वः व अधिकृतया निंतिं दँय् निकः भर्ना कायेदइगु व्यवस्था दुगु दावी यानाच्वंगु दु । थुगुसी सेनां भर्नाया निंतिं वःपिं ५० द्वः आवेदकतपाखें ५० लाख तका दां राजश्वय् दाखिला नापं यायेधुंकूगु दु ।