उत्सर्जन क्वपालेगु अमेरिकाया घोषणा

कोपनहेगनय् विश्व पर्यावरणयात कयाः अन्तर्राष्ट्रिय सम्मेलन शुरु जू कुन्हु हे अमेरिकां कार्बन ग्यास उत्सर्जनपाखें मानव सभ्यताय् हानी यानाच्वंगु खँयात स्वीकार यासें कार्बन उत्पादन म्हो यायेगु अभियानय् आः थः नं लगे जुइगु घोषणा याःगु दु। अमेरिकापाखें नकतिनि याःगु थ्व घोषणायात कोपनहेगन सम्मेलनयात बिउगु छगू उपहार धाःसां छुं मपाः ।

अमेरिकां कार्बन उत्सर्जन म्हो यायेगु घोषणा याःसां उकिया परिमाण, ई, शर्त आदिया बारे धाःसा आः तक छुं धाःगु मदुनि। विश्वया कार्बन उत्सर्जनय् दकलय् अप्वः ब्वति दुगु देय् अमेरिका हे खः। उकिं अमेरिकां सामान्य जक नियन्त्रण यायेगु सहमति बिउसां उकिं तःधंगु लिच्वः लाकीगु खँय् विवाद मदु। लिसें अमेरिकां थ्व पलाः ल्ह्वनेसातकि विश्वया मेमेगु नं कार्बन उत्सर्जनय् महत्वपूर्ण भूमिका दुपिं देतय्त थःपिंसं नं अज्याःगु घोषणा यायेत दवाव सिर्जना जुइ। अमेरिकां घोषणा मयाःतले मेपिं नं घोषणा यायेत बाध्य जुइ मखु ।

कार्बन उत्सर्जन म्हो यायेगु बारे थःपिं सक्रिय जुइगु धकाः थ्व स्वयां न्ह्यः चीनं बचं बीधुंकूगु दु। थ्व धुंकाः आः जापान, भारत, दक्षिण अमेरिकाया तःधंगु देय्त व खास यानाः युरोपेली देतय्सं थज्याःगु बचं बीमाःगु आवश्यकता दु। यदि अमेरिकापाखें बचं वयेसातकि मेमेगु देतय्सं नं धमाधम उत्सर्जन क्वपालेगु घोषणा याना हल धाःसा अमेरिका थम्हं यायेधुंकूगु घोषणापाखें लिचिलेगु अवस्था वइ मखु। विश्वया सम्पूर्ण प्राणीया अस्तित्व हे खतराय् लाइ कथं वयाच्वंगु थ्व हाथ्यायात केवल व्यापार व्यवसायया दृष्टिकोणं जक स्वये मजिउ धइगु खँ विश्व समुदायं थुइकेमाःगु दु ।

More Stories Like this