ज्ञानेन्द्रयाके नं कर काइगु
कैलाली घटनाय् छानबीन समिति स्वन
येँ (सन्ध्या टाइम्स)/मन्त्रिपरिषद्या थौं सुथय् च्वंगु बैठकं पुलांम्ह जुजु ज्ञानेन्द्र शाहयात नं सामान्य नागरिक सरह करया दायराय् हयेगु निर्णय याःगु दु। बैठकं भाजु शाहयात देशय् गणतन्त्र पलिस्था जूगु मितिनिसें कर कायेगु धकाः क्वःछिउगु खः। तर थ्व कर गय् यानाः व छु दरं कायेगु धइगु खँय् धाःसा छुं निर्णय मयाःनि।
अथे हे बैठकं कैलाली घटना लिपा तच्वया वंगु राजनीतिक तनाव म्हो यायेगु निंतिं गोपालमणि गौतमया नेतृत्वय् सुकुम्बासी छानविन उच्चस्तरीय आयोग दयेकेगु निर्णय नं याःगु दु। उगु आयोगया रिपोर्ट वयेधुंकाः जक कैलाली घटनाय् लानाः घाःपाः जूपिं व सीपिनि बारे निर्णय जुइगु खँ धाःगु खः ।
लिसें मधेस आन्दोलनय् घाःपाः जूपिं व सीपिनिगु निंतिं निगू करोड तका दां खर्च यायेगु निर्णय नं याःगु दु।
प्रधानसेनापति छत्रमान गुरुङ भारत भ्रमणय् वंगुलिं वय्कःया थासय् रथी तोरण जंगबहादुरयात हे कायम मुकाम नियुक्त यायेगु निर्णय नं याःगु दु। मानव अधिकार उल्लंघनया घटनाय् लानाः तोरणया बढुवा स्थगित जुयाच्वंगु खः ।
अथे हे वर्तमान सरकारया नीति व ज्याझ्वः कथं न्हापा हे घोषणा यानातःगु दलितलिसे इहिपा याइपिंत ध्यबा बीगु कार्यक्रमया नितिं नं ध्यबा लिकायेगु खँ क्वःछिउगु दु ।
