हाकनं प्रेसयात हे प्रहार

- कृष्ण प्रजापति

तानाशाही ब्यवस्थां जक प्रेसयात थीथी कथं दमन यानाच्वनीगु खँ वयाच्वंगु खः । तर आः वयाः अथे जक मखुसें गणतान्त्रिक ब्यवस्थाय् नं प्रेस स्वतन्त्रतायात कुण्ठित यायेत स्वइगु जुयाच्वन धइगु खँ थौं थःपिनि ल्हातय् सत्ता दुगु आधारय् गुण्डागर्दी क्यना जुईपं छुं मनूतय्गु गतिविधिं क्यना बिउगु दु । सत्तासीन माओवादीया हे मजदूर यूनियनपाखें मजदूरतय्त शोषण जुल धकाः आः नकतिनि हिमाल मिडियाया ज्याकुथी याःगु आक्रमण थुकिया लिपांगु दसु खः । हिमाल मिडियाय् जूगु आक्रमण विरुद्ध पत्रकार जगत निरन्तर आन्दोलनय् लगे जुयाच्वंगु हे इलय् कान्तिपुरया पूर्वात्र्चल क्षेत्रीय प्रकाशन नं प्यन्हु
न्ह्यवंनिसें बन्द याना बिउगु दु ।

वास्तवय् प्रजातन्त्र व स्वतन्त्र प्रेस धइगु छगुलिं मेगु पुरक हे धाःसां जिउ । गन प्रेस स्वतन्त्रता दइ मखु अन प्रजातन्त्र नं दु धाये फइ मखु । तर समाचार प्रकाशनयात कयाः वा थःपिनि स्वार्थ पूमवंगु खँयात कयाः थुकथं मिडिया हाउसय् आक्रमण यायेगु श्रमजीवी पत्रकारतय्त दुत तकं मछ्वसे पिने हे तया तयेगु व प्रेस लिसें सम्बन्धित मनूतय्त तकं ज्याय् दुमछ्वसें दुःख बीगु धइगु छगू ल्याखं अराजनीतिक गतिविधि ला खः नापं उच्छृंखल व तानाशाही प्रवृत्ति नं खः । खः अन दुने च्वंपिं छुं मजदूरत पीडित जूगु दु । अन दुने पत्रकारतय् ज्याला मगानाः थीथी कथंया संघर्ष यानाः असन्तोष ब्यक्त यानाच्वंगु नं खः । तर मिडियापाखें पिहां वयेमाःगु प्रकाशनयात हे बन्द याना बीवं समस्या धाःसा ज्यनी मखु । अज्याःगु समस्या ज्यंकेगु निंतिं थीथी कथंया वैकल्पिक उपाय नं मालेफु । तर थन माओवादीया भातृ संगठनं सरकारयात हे मिछंके कथं ज्या यानाः क्यनाच्वंगु दु ।

पत्रकार जगतयात जुयाच्वंगु थीथी कथंया समस्यायात पत्रकार जगत स्वयमं हे समाधान यायेमाःगु खः । पत्रकार वा प्रेस जगत धइगु तसकं मर्यादित पेशा खः । प्रेसं गबलें ल्वाभः ल्ह्वनी मखु । प्रेसं कुस्ती नं म्हिती मखु । गलत विचार प्रचार यात धाःसा उकिया खण्डन नं प्रेसं यायेमाः । हिमाल मिडियाय् माओवादीया भातृ संगठनं हेआक्रमण याःगु खँयात कयाः प्रधानमन्त्री नं जुयाच्वनादीम्ह माओवादी अध्यक्ष प्रचण्डं थ्व ज्याय् संलग्न अपराधीतय्त कारवाही यायेगु जुइ धकाः ला आश्वासन बियादीगु दु । तर व्यवहारय् धाःसा उकथंया गतिविधि क्यनादीगु मदुनि । बरु उमित गथे जिल अथे यानाः बिसिके छ्वयेगु कथं यल जिल्ला प्रशासनय् हाजिर याये हयाः नं आः वयाः उपिं उगु इलय् छुं छगू अमूर्त होटेलय् उद्योगपतितनाप वार्ताय् दुगु व उगु आक्रमणय् थःपिं संलग्न मदु धइ कथंया नक्कली स्पष्टीकरण
बीगु ज्या यानाच्वंगु दु ।

थ्व ल्याखं वर्तमान प्रेस जगतयात जूगु आक्रमण प्रति प्रधानमन्त्री पुष्पकमल दाहाल प्रचण्डं हे छु यायेगु धकाः धाये मफुगु अवस्थाय् लानाच्वंगु दु । थज्याःगु इलय् प्रधानमन्त्री थेंज्याःगु मर्यादित पदय् च्वनाच्वंम्ह मनुखं यदि थम्हं धयागु खँ पूवंके मफइगु खःसा प्रधानमन्त्री पदं राजीनामा बीमाः । जिम्मेवार ब्यक्तितय्सं कि बचन हे बी मजिउ कि त बचन बीधुंकाः उकियात पूवंकेमाः । थौं हिमाल मिडियाया यलय् च्वंगु ज्याकुथी माओवादी मजदूरतय्सं हिंसात्मक तरिकां याःगु आक्रमण विरुद्ध नेपाल पत्रकार महासंघ सतक आन्दोलनय् सरिक जुयाच्वंगु ई खः । सरकारं छझाः वार्ता यानाः नेपाली पत्रकार
जगतया माग प्रति तालतुल यायेत नं स्वयाच्वंगु दु । तर सतक आन्दोलनय् कुहां वयेधुंकूपिं पत्रकारत आः थःपिनि संस्थाय् थुकथं गबलें हे आक्रमण जुइ मखुत धइगु ग्यारेन्टी मदुतलेया लागिं निरन्तर संघर्ष व वार्ता न्ह्याकां तुं च्वनेमाः ।

हडताल यानाः कान्तिपुरया पूर्वात्र्चल संस्करण पिहां वये मफुगुलिं लाखौं पाठक विज्ञापनदाता नापं सूचनाया अधिकारकाये मखंिपं सर्वसाधारण तम्वयाच्वंगु दु । तर सरकारं वार्ता यानाः नं पत्रिका पिकायेकेगु व्यवस्था याना बीमफु । छगू त्वह दयेवं प्रेस हे बन्द यायेगु प्रवृत्ति बांलाःगु मखु । थौं माओवादीं अथे हे यानँच्वंगु दु । म्हिगः जंगलय् च्वनाः जनयुद्ध यानाच्वंगु इलय् उमिके खने दुगु जंगली प्रवृत्ति थौं नं कायम दनि । सत्ताय् थ्यनेधुंकाः नं पुलांगु संस्कार त्याग याये मफुनि । अथे जुयाः हे थःगु गतिविधिं थः हे लज्जास्पद जुइमाःगु स्थिति ब्वलनाच्वंगु खः । पत्रकार ख्यलय् जूगु प्रहार विरुद्ध थौं सतकंनिसें सदन तकं क्वानाच्वंगु दु । सभासद्तय्सं हिमाल व कान्तिपुर पब्लिकेशनय् जुयाच्वंगु आक्रमणया विरोध यानाच्वंगु दु । सरकारया ध्यानाकर्षण यानाच्वंगु दु । तर न्हाय्पं मताःम्ह सरकार वा मिखां मखंम्ह सरकार जुयाच्वंगु कारणं खइ सदनय् थ्वःगु सः नं तायाच्वंगु मदु ।

ततःधंगु राजनीतिक पार्टीत म्हिगः गथे खः अथेहे भागबन्दाया राजनीतिइ जक तक्यनाच्वंगु कारणं थौं न राजनीति स्पष्ट ढंगं न्ह्यायेफुगु दु न त जनजीविकाया सवालय् हे मौलिक परिवर्तन हयेफुगु दु । झिंप्यंगू संसदीय समिति नीस्वनाः नं उकिया नेतृत्व याईपं सभापतितय्गु ल्यज्या याये फयाच्वंगु मदुनि । देय्या हीतय् ज्या यायेगु खःसा सरकारं थज्याःगु हाथ्यात सामना याना वने फयेकेमाःगु खः । खाली विदेशीया इसाराय् चले जुइगु प्रवृत्तिं नेपाःयात ताः ई तक सार्वभौमसत्ता सम्पन्न याना तइ मखु । छन्हु छन्हु यानाः बुलुहुँ थ्व देश परमुखापक्षी जुइ मालेफुगु खँयात ध्यानय् तयाः थःगु देश दुने खने दुगु सेना समायोजन नापं थीथी समस्यायात उचित ढंगं सरकारं समाधान याये फयेकेमाः । मखुत धाःसा आः थें थीथी राजनीतिक पार्टीं सेना दयेका हयेवं समस्या नं ब्वलनेफु । उकिं प्रेस जगतयात खनेदुगु थुगु मारयात सकल राजनीतिक पार्टी व मानव अधिकारवादीतय्सं नं गम्भीर जुयाः स्वयाः क्यनेमाः ।

More Stories Like this