शुरु जूगु कोपेनहेगन सम्मेलन

विश्व जलवायु परिवर्तनयात कयाः चिउताः प्वंकेगु ताः तयाः डेनमार्कया राजधानी कोपनहेगनय् म्हिगःनिसें अन्तर्राष्ट्रिय सम्मेलन शुरु जुल। खास यानाः विकसित देय्तय्सं औद्योगिक विकासया झ्वलय् मिखा तिसिनाः याःगु कार्बन उत्सर्जनया ज्यां थ्व पर्यावरण समस्या पिहां वःगु खःसा थ्वहे खँयात उजागर यानाः अज्याःगु विकसित देय्तय्त थुखेपाखे सचेत यासें आवंलि कार्बन उत्सर्जनया ज्यायात छुं भचा जूसां क्वपालेत बाध्य यायेगु ताः तयाः थ्व सम्मेलन जूगु खः। विश्व पर्यावरणय् वयाच्वंगु हिउपाः प्रति चिउताः तयाः विश्वन्यंकंया थुलिमछि देय्त छथाय् च्वं वःगु थ्वहे न्हापांगु घटना खः। कार्बन उत्सर्जनया ज्याय् न्ह्यलुवा जुयाच्वंगु देय्तय्त थुकिं अवश्य नं दवाव सिर्जना याइ धकाः आशा कायेफु।
विकसित देय्तय् कार्बन उत्सर्जनया ज्यां गरीबतय्त गज्याःगु तक लिच्वः लानाच्वन धइगु खँपाखे उमिगु ध्यान साला कायेगु लागिं आः नकतिनि नेपालं च्वापु नाया वयाच्वंगु सगरमाथाया बेस क्याम्पय् मन्त्रिपरिषद् बैठक च्वनाः क्यंगु खःसा छुं ई न्ह्यः समुद्रया सतह थहां वयाः देय् हे तनीगु खतराय् लानाच्वंगु माल्दिभ्सं समुद्रया क्वय् हे मन्त्रिपरिषद्या बैठक च्वनाः थःपिनि मार्मिक सन्देश प्रवाह याःगु खः। गरीब देय्तय्सं क्यनाच्वंगु थ्व चिउताःयात धनी देय्तय्सं अवश्य नं ध्यान बीमाः। अथे धकाः थ्व गरीब देय्तय्गु जक चिउताःया विषय मखु। थुकिं धनी देय्तय्त नं उतिकं हे लिच्वः लाकाच्वंगु दइ। यदि कोपेनहेगनय् थुपिं खँयात ध्यान तयाः धनी देय्तय्सं कार्वन उत्सर्जन म्हो यायेगुपाखे पलाः ल्ह्वनेगु छुं घोषणा यात धाःसा वहे सम्मेलनया दकलय् तःधंगु उपलब्धी जुइ ।

More Stories Like this