कार्यदलया बैठक नं अथें क्वचाल
प्याकेजय् सहमति यायेगु माओवादी प्रस्ताव
येँ (सन्ध्या टाइम्स)/कैलाली घटना लिपा तच्वया वंगु राजनीतिक तनाव म्हो यायेगु निंतिं स्वंगू तःधंगु पार्टीतय्सं दयेकूगु कार्यदलया थौं च्वंगु न्हापांगु बैठक बिना निष्कर्ष क्वचाल। सुथय् शान्ति मन्त्रालयय् च्वंगु उगु बैठकं छुं हे निष्कर्ष पिकाये मफयेवं कन्हय् सुथय् ९ बज हानं बैठक च्वनेगु निर्णय यासें थौंयात बैठक दिका छ्वःगु खः ।
बैठकय् दुथ्याःम्ह छम्ह दुजलं 'सन्ध्या टाइम्स'यात कनादी कथं बैठकय् खास यानाः दथुया लँपु लिना वनेगु धकाः खँ शुरु जूगु खः। दथुया लँ धायेबलय् स्वंगुलिं पार्टीपाखें थःथःपिनि अडानयात छुं भचा लचक यानाः न्हूगु सहमति मालेगु खः। तर थःपिनि अडानया छुं हे बुँ त्वःतेत धाःसा पार्टीत तयार मजुइवं बैठक निष्कर्षहिन जूगु खः ।
खुम्ह दुजः दुगु कार्यदलय् माओवादीपाखें नारायणकाजी श्रेष्ठ व देव गुरुङ्ग, कांग्रेसपाखें अर्जुन नर्सिह केसी व कृष्ण सिटौला, एमालेपाखें भीम रावल व भरतमोहन अधिकारी च्वनादीगु खः। थौं अर्जुन नर्सिंह केसी मथ्यं ।
उखे कैलालीइ समस्या ज्यंकेत थौं च्वंगु सर्वदलीय बैठक नं छुं हे निर्णय मयासे क्वचाल। सीपिनि छेँजःपिंत क्रिया खर्च बीगु धकाः फुक्क दलपाखें वःगु प्रस्तावयात सीडीओं अस्वीकार यायेवं बैठकं छुं लिच्वः पिकाये मफुगु खः। अनया बन्द धाःसा जारी हे दनि ।
सुथंनिसें तयारी बैठक
येँ (सन्ध्या टाइम्स)/माओवादीं आःया अवस्थाय् राजनीतिक सहमति यायेगु खःसा प्याकेजया रुपय् हे यायेमाः धयाच्वंगु दुसा वहे प्याकेजया रुपय् सहमति यायेत म्हिगः जक दयेकूगु कार्यदलया मुँज्याय् गुगु कथं खँ यंकेगु धइगु विषययात कयाः थौं सुथय् स्थायी समितिया बैठक च्वन।
पार्टीया मू ज्याकुथी च्वंगु उगु बैठकय् न्हापांनिसें माओवादीं ल्ह्वना वयाच्वंगु राष्ट्रपतिया पलाः, संविधान निर्माण, शान्ति प्रकृया, सेना समायोजन, राष्ट्रिय स्वाधिनता नापं संयुक्त राष्ट्रिय सरकार हे थःपिनि प्याकेज जूगुलिं वहे विषययात कयाः कांग्रेस व एमालेया न्ह्यःने गुकथं खँ तयेगु धकाः सहलह ब्याकूगु खः ।
बैठकय् कैलालीया घटनायात कयाः आः थथेंया निंतिं सुकुम्बासीतय्त माःगु ब्यवस्था यायेगु प्रस्ताव तयेगु धकाः नं सहलह जूगु खँ सीदुगु दु ।
माओवादीया छम्ह नेतां कनादी कथं जनताया संघीय लोकतान्त्रिक राष्ट्रिय गणतन्त्र पलिस्था यायेगु हे माओवादीया आःया मू आज्जु धकाः केन्द्रीय कमिटीं क्वःछिना तयेधुंकूगु जुयाः न्ह्यागु जूसां व लँपु त्वःताः पार्टी न्ह्यःने मवनीगु जुयाच्वंगु दु ।
