'दिं' धाःसा गय् जुइ ?
सम्पादकजु,
नेपाःया राष्ट्रिय संवत् नेपाल संवत्यात अःपुक व्यवहारय् छ्यलेगु लागिं न्हूगु क्यालेण्डर पिहां वःगु दु । उकी नेपाल संवत्या महिनायात नं विक्रम संवत्या महिना थें छ्यलाः तयातःगु दु । भाजुपिं देवदास मानन्धर व समिर कर्माचार्यिपंसं थ्व क्यालेण्डर पिकाःगु खः । वय्कःपिं सुभाय्या पात्र खः । तर वय्कःपिंसं नेपाल संवत्या दिनगन्ती कायेबलय् विक्रम संवतय् गते व इस्वी संवतय् तारिख धाये थें नेपाल संवतय् छु धायेगु धकाः उल्लेख याना मदी । थुकिया शव्द प्रयोग यायेगु बारे वय्कःपिंत नं द्विविधा जुयाच्वंगु थें च्वन । जिं स्वयेबलय् नेपाल संवतय् अथे दिनगन्ती याइगु गतेयात 'दिं' धइगु शव्द प्रयोग याःसा जी थें च्वं । उकियात नेवाः भासं 'दिं' धकाः छ्यःसा खय् भासं 'दिन' धकाः छ्यःसां जिल । थथे जुइबलय् नेपाल संवत्या क्यालेण्डर अःपुक छ्यले फइ । गथे कि नेपाल संवत् ११२९ कछला २६ दिं । अथवा २६ दिन । थ्व दिं धइगु नं गते धाये थें खः । आः धायेबलय् थाकु थें च्वंसां लिपा प्रयोग जुजुं वनीबलय् सामान्य जुयावनी । न्ह्यागु खँ नं शुरुइ मिछं थें च्वंसां लिपा अथें मिले जुया वनीगु खः । झी नेपाल संवत्या आन्दोलनकारी नापं नेपाल संवत्या अःपुगु क्यालेण्डर दयेकादीपिं भाजु मय्जुपिंसं थुकिया बारे बिचाः यानादी
धकाः आशा यानाच्वना । सुभाय् ।
- राजभक्त श्रेष्ठ, सिन्धुपाल्चोक
(हाल येँ)
More Stories Like this
केन्द्रया अनुमति कयाः आर्थिक ज्या जुइ मखु प्वंकेमखंगु श्रद्धांजिल सुवर्ण शाक्य कि सुवर्णकेशरी ? लाःलाःथें भाःथकाये मजिल बांलाःगु सुझावयात सुभाय्
