थौं स्वम्ह शीर्ष नेताया मुँज्या
संविधानसभाय् प्रम, प्रचण्ड व झलनाथ
येँ (सन्ध्या टाइम्स)/एनेकपा (माओवादी),नेपाली कांग्रेस व नेकपा (एमाले)या शीर्ष नेतातय् दथुइ थौं सनिलय् बैठक च्वनीगु जूगु दु ।
कैलालीइ सुकुम्बासीतय्त प्रहरीं हस्तक्षेप यायेवं जूगु ल्वापुइ लानाः सीपिंत सहिद घोषणा यायेमाःगु, छेँजःपिंत क्षतिपूर्ति बीमाःगु माग यासें याःगु आन्दोलन नापं देशय् ब्वलनाच्वंगु राजनीतिक गतिरोध बारे सहलह ब्याकेत उगु शीर्ष बैठक च्वनेत्यंगु खः ।
माओवादीं कैलाली घटनाय् सीपिंत सहिद घोषणा यायेमाःगु, उमि छेँजःयात क्षतिपूर्ति बीमाःगु, घाःपाः जूपिंत सितिकं वासः यायेमाःगु, घटनायात कयाः स्वतन्त्र छानबिन यानाः दोषीयात कारवाही यायेमाःगु माग तयाः म्हिगः नेपाल बन्द याःगुलिं आः थ्व समस्या झन तच्वया वनेफुगु तायेकाः म्हिगः हे प्रधानमन्त्री माधव नेपालं माओवादी अध्यक्ष प्रचण्डयात नापलानाः थौं स्वंगू पार्टीया शीर्ष नेतातय्गु बैठक च्वनाः राजनीतिक सहमति पिकायेगु तयारी याःगु खः। थौं सनिलया ४ बजे प्रम निवास वालुवाटारय् उगु बैठक च्वनेगु क्वःछिनातःगु दु ।
थ्वहे झ्वलय् माओवादीया नेपाल बन्दं यानाः म्हिगः न्हापांखुसी संविधानसभाया बैठक तकं सुचं जक तिकाः स्थगित याःगु खः। थौं न्ह्यानाच्वंगु बैठकय् प्रधानमन्त्री माधव नेपाल, माओवादी अध्यक्ष प्रचण्ड, एमाले अध्यक्ष झलनाथ खनाल, नेपाली कांग्रेस संसदीय दलया नेता रामचन्द्र पौडेल लगायतया शीर्ष नेतातय्सं ब्वति कयाच्वंगु दु ।
संविधानसभा अध्यक्ष सुवास नेम्वाङं संविधान दयेकेगु निंतिं तालिका इलय् ब्यलय् हिले मालाच्वंगु, दलतय् दथुइ हे कचमच जूगुलिं जनतां संविधान इलय् हे दयेके फइ मखु धकाः तायेका हयाच्वंगु नापं शीर्ष नेतातय्सं हे संविधानसभाय् ब्वति मकाः धकाः खँ वयाच्वंगु बांलाःगु मखु धासें विशेष इनाप यानाः थौंया सविधानसभा बैठकय् सकलें शीर्ष नेतातय्त उपस्थित जुयादीत आग्रह यानादीगु खः। थौंया बैठकय् संविधानसभाया प्राकृतिक स्रोत, आर्थिक अधिकार नापं राजश्व बाँडफाँड समितिं पेश याःगु प्रारम्भिक मस्यौदा प्रतिवेदनयात कयाः सहलह जुयाच्वंगु दु।
कैलालीया सुकुम्बासी घटनां यानाः सरकार व माओवादी दथुया स्वापूयात अझ ख्वाउँका बिउगु दु। माओवादीं थ्व आन्दोलनयात अझ तच्वयेका यंकेगु रणनीति दयेकूगु दुसा सरकारया सुरक्षा निकायं यदि आन्दोलन तच्वल धाःसा उकियात दमन यानाः न्ह्यःने वनेगु तयारी याःगु दु ।
माओवादीं थ्व घटनायात कयाः थौं नं कञ्चनपुर लागा बन्द हे यानातःगु दनि। उगु लागा अनिश्चितकाल तक बन्द यायेगु घोषणा यानातःगु दु ।
