सगरमाथा मुँज्यां विश्वयात बिउगु सन्देश
सगरमाथाया आधारशिविरय् आः नकतिनि च्वंगु नेपाल सरकारया ऐतिहासिक मन्त्रिपरिषद् बैठकं विश्व वातावरणय् वयाच्वंगु नकारात्मक हिउपालं नेपाः जक मखु नेपाः थेंज्याःगु विश्वया आपालं अल्पविकसित व गरीब देशय् वयाच्वंगु खतरापाखे विश्वया ध्यान सालेत ताःलाःगु दु। विश्व पर्यावरणय् वयाच्वंगु हिउपालं नेपाः थेंज्याःगु हिमाली देशय् च्वंगु च्वापुगुँया च्वापु ग्यानापुक नाया वयाच्वंगु दु। थुकिं नेपाःया कृषि, पर्यटन, जलश्रोत, सामान्य जनजीवन आदि थेंज्याःगु ख्यःयात प्रभावित याइगु ला द हे दु, उकिया नापनापं मुक्कं दक्षिण एशियाया हे हिमाली लागाय् च्वनीपिं मनूतय् जनजीवनयात नं बांमलाःगु लिच्वः लाकीगु खतरा नं उतिकं दु। थुकिं थ्व लागाया १ अर्ब ३० करोड जनताया जीवनय् बांमलाःगु लिच्वः लायेफुगु खँ थ्व सम्बन्धी अनुसन्धानतय्सं धाःगु दु। उकिं नेपालं थ्व विषयय् विश्वया धनी देय्तय् ध्यान सालेत सगरमाथाया आधार शिविरय् वनाः गुगु मन्त्रिपरिषद् बैठक च्वन, उकिं यक्वं सकारात्मक लिच्वः पिकाइगु आशा कायेफु। नेपाल सरकारं याःगु थ्व ज्यां नेपाःया समस्यापाखे जक मखु विश्वया आपालं गरीबतय् समस्यापाखे समेत विश्वया ध्यान सालीगु निश्चित दु। उकिं नेपाः सरकारया थ्व पलाःया राष्ट्रिय जक मखु अन्तर्राष्ट्रिय महत्व समेत दु ।
आः याकनं हे थ्वहे विषययात कयाः डेनमार्कया कोपनहेगनय् विश्व सम्मेलन जुइत्यंगु दु। उगु सम्मेलनया मू आकर्षण आः नेपाः नं जुइगु खँय् विवाद मदु। विश्वं थःपाखे ध्यान बियाच्वंगु थ्व इलय् नेपालं अन समग्र गरीब मुलुकतय् प्रतिनिधित्व यासें सशक्त सः तयेगु ज्या यायेमाः ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
