कालापत्थर बैठकया पुलुपालु

वंगु शुक्रवाः समुद्र सतहं १७,१९२ फिट च्वय् लाःगु काला पत्थरय् नेपाल सरकारया मन्त्रि परिषदया बैठक सम्पन्न जुल। बैठकया थःगु हे महत्व दुगु ला ख हे खत, बैठकया झ्वलय् आपालं रोचक घटनात नं जुल ।

कालापत्थर धइगु थासय् सामान्य स्वयां ५० प्रतिशत अक्सिजन म्हो जुइगु जुयाच्वन। उकिं अन वनेवं हे मनूयात अल्टिच्युट सिकनेस जुइगु यक्व सम्भावना दइ ।

कालापत्थर वंपिं मन्त्रीतय्त अथे मजुइमा धकाः वय्कःपिंत स्यांबोचे विमानस्थलं छक्वलं कालापत्थर मयंकुसे वयां भचा क्वय् लोबुचे धाःगु थासय् क्वकयाः अनं न्यासिके यंकूगु जुयाच्वन। गुलिं मन्त्रीत न्हापा हे कालापत्थर थ्यन। गुलिं लिपा तिनि थ्यन। न्हापा थ्यंपिंत अन च्वने थाकुइ धुंकल। उकिं मेपिं मन्त्रीत मवःनिवं हे प्रधानमन्त्री माधव नेपालं बैठक शुरु यानादिल। घोषणापत्रया झिगू बुँदा मध्ये च्यागू ब्वने सिधःबलय् अन १३ म्ह तिनि मन्त्रीत थ्यन। प्रम नेपालं धयादिल कि बाँकी निगू बुँदा मेपिं मन्त्रीत नं थ्यन कि ब्वने माली। तर उपप्रम सुजाता कोइराला थःत तसकं छ्यों स्याना वःगुलिं बैठक याकनं सिधयेके माली धकाः हाला हल। वय्कःया प्रस्ताव कथं बैठक याकनं सिधयेकल। कोइराला चाहिं कार्यक्रम पूमवंकं हे क्वय् लिहां झाल। घाराघुरुया दथुइ बैठक च्वंगुलिं थ्व बैठक गुलि मिनेट च्वन धकाः हे धायेमछिंगु खँ अन थ्यंम्ह छम्ह फोटो पत्रकारं धाल ।

कालापत्थर वनेगु खँय् पत्रकारतय् दथुइ तःधंगु हे कचवं जुल। अन पत्रकार थ्यंगु दु ७५ म्ह, तर च्वय् यंकीगु जुयाच्वन १० म्ह जक। सु सु वनेगु? विदेशी न्याम्ह व स्वदेशी न्याम्ह वनेगु धकाः छनौट जुल। बल्लबल्ल नां ल्ययाः फोटो व भिडियो खिचे याइपिं झिम्हेसित च्वय् छ्वल ।

च्वय् वनीपिं मन्त्रीतय्त अक्सिजन घाकूबलय् स्थानीय शेर्पातय्सं मन्त्री म्हमसियाः नं आपत जुल। विजय गच्छेदारयात सुनां हे वास्ता मयाः। वय्कः ला अक्सिजन हे मतसे हेलिकप्टर गयेत्यंगु। छम्ह पर्यटन व्यवसायीं खंकाः तिनि अक्सिजन बिया छ्वत ।

प्रधानमन्त्री व मन्त्रीतय्त लुक्लाया ला भिल्ला शेर्पि नी धाःगु होटलय् तःगु खः। बहनी स्थानीय शेर्पिनी मिस्तलिसे वय्कःपिं खुब हे प्याखं हुलादिल। अय्लाः व बियर नं उलि हे त्वनादिल खनिं। कार्यक्रम सिधयेकाः छम्ह शेर्पिनीं धाल, 'ओहो, सुजाता नं तसकं हे बियर त्वनेमाःम्ह जुयाच्वन खनिं का ।'

वहे होटलय् प्रधानमन्त्री वइबलय् वय्कःयात सलामी बीमाः लाकि म्वाः धकाः पुलिसतय् दथुइ विवाद जुयाच्वंगु नं न्यनेबहः जुल ।

च्वय् बैठक सिधयेकाः कुहां वःबलय् प्रम नेपाल व वय्कःया कलाः गायत्री नेपालयात याक गयेकाः छझाः न्ह्यःने यंकूगु खः। याक गयेकेगु खँय् नं स्थानीय शेर्पातय् दथुइ विवाद जुल। याक गयेकल धाःसा अशुभ जुइ धाइपिं नं अन दुगु जुयाच्वन। याकया म्हय् गयाखतं प्रम नेपालं ल्हाः ल्ह्वनाः धयादिल, 'गजब जुल !'

लिपा वय्कलं गयाः त्वःता तःम्ह वहे याकया म्हय् सञ्चार मन्त्री शंकर पोखरेलं नं गयाः छपाः फोटो चाहिं खिचे याकल। बैठक सिधयेवं मन्त्रीतय्गु हस्ताक्षर कायेगु धकाः छपाः तपाःगु कापतय् मन्त्रीतय्गु नां स्क्रिन प्रिन्ट याका हःगु जुयाच्वन। तर उकी प्रधानमन्त्री माधव नेपालया नां हे मिस्टेक छापे याना तःगुलिं ग्वसाः खलकं व कापः पित तक हे मबिल ।

More Stories Like this