वास्तविक सुकुम्बासीया पहिचान जुइमाः

कैलाली वन अतिक्रमण यानाच्वंपिं सुकुम्बासीतय्त चीकेगु झ्वलय् जूगु ल्वापुयात कयाः सरकार व माओवादीया बिस्कं बिस्कं हे धापू वयाच्वंगु दु। घटनायात कयाः सरकार व माओवादीं निथ्वःसिनं छम्हं मेम्हेसित गुगु द्वपं बीगु ज्या जुयाच्वन थुकिं नेपाःया वर्तमान राजनीतिक गतिरोधयात तकं लिच्वः लाकीगु खःला धइगु आशंका ब्वलंगु दु।
देशय् सुकुम्बासीया नामं थीथी थासय् च्वंगु सार्वजनिक जग्गा कब्जा यायेगु ज्या तच्वया वनाच्वंगु दु। विशेषतः दुर्गम लागाय् च्वंपिं जनतां थुकथं सुविधा दुगु थासय् च्वंगु जग्गा कब्जा यायेगु ज्यायात तीव्रता बीगु यानाच्वंगु दुसा कैलालीया घटना नं थुकिया हे छगू पुनरावृत्ति जक खः।
खतुं येँय् नं सुकुम्बासीया नामय् थुकथं जग्गा कब्जा यायेगु ज्या जुयाच्वंगु दु। अले उकियात थीथी राजनीतिक पार्टीं संरक्षण याना वयाच्वंगु दु। थ्व धाःसा निश्चित रुपं उचित धकाः धाये फइगु अवस्था मदु ।

खः भूमिहिन जनताया च्वनेगु व्यवस्था सरकारं यायेमाः तर थन गुलिखे गामय् थःगु जग्गा जमिन त्वःता वयाच्वंपिंसं नं सुगम जूगु नामय् वा सुविधा दुगु नामय् शहरय् वयाः जग्गा कब्जा यायेगु धाःसा उचित मखु ।

मेता खँ धइगु नेपालय् गुलि सुकुम्बासी दु धइगु ल्याःचाः तकं सरकारं तयातःगु मदु। थुकिया कारणं वास्तविक पीडित जनता अझ नं पीडित जुयाच्वंगु दुसा मेखे पहुँच दुपिंसं शहरी लागाय् च्वंगु जग्गा कब्जा यायेगु ज्या तीव्र याना हयाच्वंगु दु। अथे जुयाः लिपा लिपा कैलालीइ थेंज्याःगु घटना हाकनं मजुइकेत सम्बन्धित राजनीतिक पार्टी व सरकारं तत्काल ध्यान बीमाःगु दु ।

More Stories Like this