नेपाल बन्द शान्तिपूर्ण
५० म्हं मल्याक प्रदर्शनकारी ज्वन
येँ (सन्ध्या टाइम्स)/एकीकृत नेकपा (माओवादी)या संयुक्त राष्ट्रिय जनआन्दोलन नेपालं थौं आह्वान याःगु नेपाल बन्दं स्वनिगःया लिसें देय्न्यंकंया जनजीवन सुथंनिसें प्रभावित जूगु दु। नेपाल बन्द सफल यायेत थौं सुथंनिसें माओवादी कार्यकर्तातय्सं येँ, यल व ख्वपलिसें देय्न्यंकं प्रदर्शन यानाच्वंगु दु ।
सरकारं नं शान्ति सुरक्षायात ध्यानय् तयाः थौं सुथय् ५ ताः इलंनिसें हे स्वनिगःया दुवाःदुवाःतय् आपालं सुरक्षाकर्मीत परिचालन यानातःगु दु ।
बन्द याकः वयाच्वंपिं माओवादी कार्यकर्तातय्सं थौं सुथय् बन्दया अवज्ञा याःगु धासें छगू दर्जन स्वयां अप्वः सवारी साधन तोडफोड याना बिउगु दुसा जबर्जस्ती सवारी साधन पनाच्वंपिं आन्दोलनकारी व प्रहरी दथुइ कलंकी, कोटेश्वर, वानेश्वर, थँबहीया लिसें थीथी थासय् ल्वापु जूगु दु ।
थ्व हे झ्वलय् प्रहरीं येँया थीथी थासं न्यय्म्ह स्वयां अप्वः प्रदर्शनकारीतय्त ज्वंगु खँ माओवादी येँ जिल्लाया इन्चार्ज पवनमान श्रेष्ठं 'सन्ध्या टाइम्स'यात कनादीगु दु। वय्कःया कथं बानेश्वर व कोटेश्वर लागां माओवादी नेवाः राज्य समितिया दुजः नापं नेता धनबहादुर महर्जन, कार्यकर्तात राजु दंगाल, रणवीर लावती, विदुर देवकोटा, तेजबहादुर बुढाथोकी, सन्तोष राई, लक्ष्मण पराजुली, कृष्ण दंगाल, सुवर्ण कार्की, गोपाल श्रेष्ठ, हरिशचन्द्र खड्कापिंत प्रहरीं ज्वनायंकूगु दु ।
आन्दोलनकारीतय्सं बन्दया अवज्ञा याःगु धासें येँया अस्कल क्याम्पस न्ह्यःने छगः गाडी च्याका बिउगु दुसा क्षत्रपाटीइ सिटिभिटिया छगः गाडी टोडफोड याना बिउगु दु। अथे हे तीनकुनेय् छगः मोटरसाइकल च्याका बिउगु दु ।
अथे हे इलामय् नं छगः मोटर साइकल च्याका बिउगु दुसा पोखराय् पत्रिका मीगु ज्या तकं बन्द याकूगु दु ।
प्रहरीं कञ्चनपुरय् प्यम्ह, विराटनगरय् झिंनिम्ह प्रदर्शनकारीत ज्वंगु दु ।
कैलालीइ वन अतिक्रमण यानाच्वंपिं सुकुम्बासीतय्त चीकेगु झ्वलय् वंगु शुक्रवाः कुन्हु प्रहरी व सुकुम्बासीया दथुइ जूगु ल्वापुइ लानाः थः कार्यकर्तात सीगु व घाःपाः जूगु विरोधय् माओवादीं थ्व बन्द आह्वान याःगु खः ।
आन्दोलनया झ्वलय् माओवादीं कैलाली घटनाय् सीपिंत सहिद घोषणा यायेमाःगु, उमि छेँजःयात क्षतिपूर्ति बीमाःगु, घाःपाः जूपिंत सितिकं वासः यायेमाःगु, घटनायात कयाः स्वतन्त्र निकायपाखें छानविन समिति दयेकाः दोषीयात कारवाही यायेमाःगु नापं देय्न्यंकंया भूमिहिनतय्त स्थायी पुनर्वासया व्यवस्था यायेमाःगु माग नं याःगु दु। माओवादीं थ्व घटनायात नं संविधान मदयेकेगु षडयन्त्र खः धाःगु दु ।
घटनाया दोषी माओवादी: गृहमन्त्री
कैलाली घटनाय् माओवादी दोषी जूगु द्वपं गृह मन्त्री भीम रावलं बियादीगु दु। थौं सुथय् सरकारी धारणा स्पष्ट यायेत ग्वसाः ग्वःगु पत्रकार सम्मेलनय् न्ववायेगु झ्वलय् वय्कलं उगु द्वपं बियादीगु खः ।
माओवादीं सार्वजनिक जग्गा कब्जा यानाः उकियात राजनीतिकरण यायेत्यंगु द्वपं बियादिसें वय्कलं सार्वजनिक सम्पत्तिया रक्षा यायेगु सरकारया दायित्व जूगु खँ नं धयादीगु दु ।
पत्रकार सम्मेलनय् वय्कलं थम्हं राजीनामा नं मबीगु व प्रहरीयात कारबाही नं मयायेगु खँ नं धयादीगु दु ।
