कालापत्थर घोषणापत्र जारी

सगरमाथाय् मन्त्रिपरिषदया बैठक क्वचाल

सुरेश मानन्धर
स्याङबोचे

येँ (सन्ध्या टाइम्स)/जलवायु परिवर्तनं लानाच्वंगु असरया बारे विश्वया ध्यान सालेत विश्वय् दकलय् तजाःगु हिमाल सगरमाथाया आधार शिविर कालापत्थरय् मन्त्रिपरिषदया बैठक थौं सुथय् च्वन ।

समुद्र सतहं १७ हजार १ सय ९२ फिट च्वय् लाःगु खुम्जुङ गाविसया कालापत्थरय् थौं सुथय् च्वंगु बैठकं १० बुँदे कालापत्थर घोषणापत्रयात पारित याःगु दु।
घोषणापत्रय् वइगु वालय् डेनमार्कया कोपेनहेगनय् जुइगु विश्व जलवायु परिवर्तन सम्बन्धी सम्मेलनय् नेपालं न्ह्यब्वइगु एजेण्डा सहित थीथी झिगू बुँदायात पारित याःगु खः। नेपालं कोपेनहेगनया बैठकय् 'हिमाल ल्यंकेनु' धइगु प्रस्ताव न्ह्यब्वयेगु तयारी यानाच्वंगु दु ।

करिब २० मिनेट तक च्वंगु उगु बैठकं थीथी झिगू बुँदाया प्रस्ताव पारित याःगु जानकारी उपप्रधान तथा परराष्ट्र मन्त्री सुजाता कोइरालां बियादीगु दु ।

मन्त्रिपरिषदया बैठक लिपा दकलय् न्हापां लिहां वःम्ह मन्त्री कोइरालां पत्रकारतलिसे खँ ल्हायेगु झ्वलय् विश्वय् विकसित मुलुकतय्सं उत्पादन यानाच्वंगु कार्वनया कारणं नेपाः थेंज्याःगु विकासोन्मुख मुलुकय् लिच्वः लाःगु खँ कनादिसें विकसित देशं कार्बन उत्पादन म्हो यायेमाःगु खँ धयादीगु दु।
वय्कलं विकसित देशं थःपिनि राष्ट्रिय आम्दानी (जीडीपी) या १ दशमलव ५ प्रतिशत ध्यबा नेपाः थेंज्याःगु विश्वया गरिब मुलुकयात बीमाःगु माग नं यानादीगु दु ।

अथे हे थौंया बैठकं नेपाःया राष्ट्रिय निकुञ्ज क्षेत्र २० प्रतिशत जुयाच्वंगुयात अप्वयेकाः २५ प्रतिशत यायेगु निर्णय नं याःगु दु। लिसें नेपाःयात ग्रीन नेशन दयेकेगु प्रस्ताव नं पारित याःगु दु ।

अथे हे थौंया मन्त्रिपरिषदया बैठकं सरगमाथायालिसें छुं छुं लागायात संरक्षित क्षेत्र नं घोषणा याःगु दु। बैठकं ५,००० वर्ग किलोमिटर क्षेत्रयात संरक्षित क्षेत्र घोषणा यायेगु झ्वलय् बाँके राष्ट्रिय निकुञ्ज, गौरीशंकर संरक्षित क्षेत्र व आपिनापा संरक्षित क्षेत्र घोषणा याःगु खः ।

मन्त्रिपरिषदया थुगु निर्णय प्रकृति संरक्षण क्षेत्र घोषणाया दृष्टिकोणं तसकं महत्वपूर्ण जूगु खँ धाःगु दु ।

मन्त्रिपरिषदया बैठक लिपा कालापत्थरं लिहां वयाः पत्रकार सम्मेलन याःगु खः। उगु पत्रकार सम्मेलनय् प्रधानमन्त्री माधव नेपालं कालापत्थर घोषणापत्र ब्वनाः न्यंकादीगु खः। घोषणापत्रय् स्यना वनाच्वंगु वातावरणं नेपाःयात जक मखु, विश्वया हे मानव सभ्यतायात लिच्वः लाकाच्वंगु खँ न्ह्यथनातःगु दु ।

घोषणापत्रय् वातावरण सन्तुलनया निंतिं सगरमाथाया विशिष्ट महत्व दुगु खँ धासें वातावरणय् वयाच्वंगु हिउपाःया कारणं अतिवृष्टि, अनावृष्टि, बाढी पहिरो व सुख्खाया समस्या अप्वया वनाच्वंगु खँ नं न्ह्यथनातःगु दु ।

थौं सुथय् बैठक जुइगु थासय् वने न्ह्यः मन्त्रीत दक्वसिगुं स्वास्थ्य परीक्षण याःगु खः। थौंया मन्त्रिपरिषदया बैठकय् ब्वति काःपिं मन्त्रीत सकसिनं अक्सिजन सहित ब्वति काःगु खः ।

मन्त्रिपरिषदया बैठक च्वनेगु निंतिं म्हिगः हे प्रधानमन्त्री सहित नीप्यम्ह मन्त्रीत स्याङ्बोचे थ्यंकः वंगु खः ।

प्रमया परिवार मोह

सगरमाथाया आधार शिविरय् जूगु मन्त्रिपरिषदया बैठकय् मन्त्रिपरिषदया दुजःपिं व फोटो पत्रकारत जक मखुसें प्रधानमन्त्रीया छेँजः भ्वःछिं वंगु जुयाच्वन। प्रधानमन्त्रीलिसे प्रमया कलाः गायत्री नेपाल, काय सौरभ व म्ह्याय् सुमन नं थ्यंगु खः। प्रमया भ्वःछिसितं अन खनेवं वय्कःया परिवार मोहयात कयाः पत्रकारतय् दथुइ चर्चा परिचर्चा तकं जूगु दु। पत्रकारतय्त तकं मयंकूगु उगु मन्त्रिपरिषदया बैठकय् प्रमया परिवारयात यंकूगुलिं गुलिखे पत्रकारतय्सं असन्तुष्टि नं प्वंकूगु दु। छम्हेसिया न्यय्द्वः तका खर्च तुइगु उगु बैठकय् वय्कःया परिवारया दुजःपिंत यंकेगु गुलि तक पाय्छि जू धइगु खँय् थन वःपिं पत्रकारतय्सं न्ह्यसः तःगु दु ।