नेतातय् प्रतिवद्धता कार्यान्वयन जुइ ला

शान्ति प्रक्रियायात निष्कर्षय् थ्यंकेगु व इलय् संविधान जारी यायेगु खँ देय्या प्रमुख स्वंगू राजनीतिक पार्टीया शीर्ष नेतातय्सं मंकाः प्रतिवद्धता प्वंकूगु बुखँ सार्वजनिक जूगु दु।
खतुं देशय् राजनीतिक गतिरोध तच्वया वनेवं गनं शान्ति प्रक्रिया हे स्यनीगु जक मखुला? वा न्हूगु गणतान्त्रिक नेपाःया संविधान हे दयेके मफइगु जक खः ला? धइगु ग्याःचिकु ब्वलनाच्वंगु इलय् प्रमुख नेतातय्पाखें वःगु थ्व प्रतिवद्धताया बिस्कं हे महत्व दु। अथे खःसां नं जनता अझ नं ढुक्क जुइ फूगु अवस्था धाःसा मदु। छाय् धाःसा थन नेतातय्सं धायेगु छगू यायेगु मेता जुयाच्वंगुलिं यानाः हे थौंया राजनीतिक गतिरोध तच्वया वंगु खः धायेत लिफः स्वयेमाःगु मदु ।

तत्कालिन न्हय्गू दल व माओवादी दथुइ विस्तृत शान्ति सम्झौता जुइधुंकाः यदि उगु शान्ति सम्झौता कथं राजनीतिक पार्टीतय्सं थःपिनि दायित्व प्वंकूगु खःसा निश्चित दु थौं गुगु राजनीतिक अन्यौलता ब्वलनाच्वंगु दु, सायद थज्याःगु अवस्था मवइगु खइ। तर राजनीतिक पार्टीतय्सं धायेगु छगू यायेगु मेता यानाच्वंगुलिं आः कुन्हु थज्याःगु समस्या मवयेमा धइगु खँय् ध्यान बीमाः।
निश्चित रुपं शान्ति प्रक्रियायात थातं लाकेत व इलय् हे संविधान दयेकेगु ज्या क्वचायेकेत नेतातय्सं प्रतिवद्धता प्वंकूगु दु। अले उगु हे प्रतिवद्धता कथं हे युद्धस्तरय् ज्या यायेमाःगु आवश्यकता नं थौं जुयाच्वंगु दु। शान्ति प्रक्रियायात थातं लाकेत व संविधान दयेकेत प्रतिवद्धता जनताया न्ह्यःने प्वंकेगु व थःपिं धाःसा थीथी कचवं पिकाया ल्वाना च्वनेगु खःसा नेतातय् थ्व प्रतिवद्धताय् नं न्ह्यसः ब्वलनेफु ।

More Stories Like this