न्हू संविधान इलय् हे जारी जुइ
स्वम्ह शीर्षस्थ नेतातय्सं प्रतिवद्धता प्वंकल
येँ (सन्ध्या टाइम्स)/ शान्ति प्रक्रियायात निष्कर्षय् थ्यंकेगु व जेठ १४ गते दुने नेपाःया न्हूगु संविधान जारी यायेगु खँय् स्वंगू प्रमुख दलया नेतातय्सं प्रतिवद्धता प्वंकूगु दु।
थौं सुथय् नेपाल एफएमं ग्वसाः ग्वःगु नागरिक संवाद ज्याझ्वलय् न्ववायेगु झ्वलय् कांग्रेस कार्यवाहक सभापति सुशील कोइराला, एमाले अध्यक्ष झलनाथ खनाल व माओवादीया अध्यक्ष पुष्पकमल दाहाल 'प्रचण्डं' उगु प्रतिवद्धता प्वंकादीगु खः ।
नागरिक संवादय् न्ववायेगु झ्वलय् माओवादी अध्यक्ष प्रचण्डं शान्ति प्रक्रियाया विकल्प मदुगु खँ धासें थःपिंसं थीथी गणराज्य घोषणा यायेगु गुगु ज्या यानाच्वनागु दु थुकिं माओवादी शान्ति प्रक्रियाय् प्रतिवद्ध दु धइगु खँयात बः बीगु दाबी यानादीगु दु। अध्यक्ष प्रचण्डं संघीय राज्यया लिसें पदाधिकारीत नं घोषणा याःगु खःसा जक माओवादी शान्ति प्रक्रिया प्रति प्रतिवद्ध मदु धइगु क्यनीगु खँ नं वय्कलं धयादीगु दु ।
एमालेया अध्यक्ष झलनाथ खनालं दलत आत्मकेन्द्रित जूगुलिं वर्तमान राजनीतिइ समस्या वःगु खँ धयादीगु दु। वय्कलं संघीयतायात पाय्छि कथं संवोधन याये मफुत धाःसा झन समस्या तच्वइगु खँ नं धयादीगु दु ।
वय्कलं इलय् संविधान च्वयेगु ज्या मजुल धाःसा देश संविधान विहिन जक मखु विखण्डनपाखे वनीगु ख्याच्वः नं बियादिल ।
कांग्रेसया कार्यवाहक सभापति सुशील कोइरालां उच्चस्तरीय संयन्त्र दयेकेगु ज्या दकलय् न्हापां कांग्रेसयात आवश्यकता जुयाच्वंगु दु धासें माओवादीं घोषणा यायेत्यंगु संघीय राज्ययात कयाः विरोध प्वंकादिल। थःपिं लोकतन्त्र प्रति प्रतिवद्ध जुयाच्वनागु खँ धासें उकिया निंतिं उच्चस्तरीय राजनीतिक संयन्त्र आवश्यक जूगु खँ नं वय्कलं धयादिल ।
