सरकारं नं चिउताः क्यने माः
माओवादी समर्थित मजदुरतय् आन्दोलनं यानाः बजारय् पेट्रोल मदयाच्वंगु दु। खतुं माओवादी समर्थित मजदुरतय्सं ताः ई न्ह्यवंनिसें थःपिनि माग न्ह्यब्वयाः आन्दोलनया ज्याझ्वः क्वछिनातःगु खः। तर नं सम्बन्धि संस्थां इलय् चिउताः मतयेवं आःवया मजदुरतय्सं पेट्रोल पम्प हे तिनाः आन्दोलनय् कुहां वःगु खः। लिच्वः कथं बजारय् पेट्रोलियम पदार्थया मदयाः आम उपभोक्तातय्सं दुःख सी मालाच्वंगु दु।
खतुं देशय् जुइगु गुगुं नं कथंया आन्दोलनं अप्वः प्रभावित जुइपिं अझ नं आम उपभोक्ता हे खः। तर थुकथं म्वाःमदयेकं आम उपभोक्तां दुःख सीगु गुलि तक पाय्छि खः धइगु न्ह्यसः नं थन ब्वलनावःगु दु ।
वास्तवय् थ्व ल्वापु धाःसा मजदुर व मालिकया दथुइ खः। तर उकिं दुःख सीपिं धाःसा आम उपभोक्ता जुयाच्वंगु दु।
देशय् यातायात मजदुरतय्सं याइगु आन्दोलनं दुःख सीपिं नं आम सर्वसाधारण जनता हे खःसा आः मजदुर व मालिकया ल्वापुया कारणं नं दुःख सीपिं धइपिं नं सर्वसाधारण जनता हे जुयाच्वंगु दु ।
वास्तवय् मजदुर व सम्बन्धित पक्षया दथुइ थज्याःगु समस्या वये स्वयां न्ह्यः हे संवादयापाखें ज्यंकेगु कुतः याःगु खःसा थौंया थ्व अवस्था मवइगु जुइ। तर सम्बन्धित पक्षं थुकियात चिउताः मतयेवं आः थुकथंया समस्या ब्वलंगु खः। थनथाय् लाक्क लुमंकेमाःगु छता खँ छु नं खः धाःसा यदि इलय् हे सरकारं जकसां थुखे पाखे चिउताः तःगु खःसा नं थ्व समस्या थपाय्च्वं तच्वः मजुइगु खः लाकि? उके गुगु नं समस्या ब्वलने न्ह्यः हे उकियात इलय् हे संवोधन यायेगु वा याकेगु ज्याय् सरकारं भचा जक जूसां गम्भीर जुइ हे माः ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
