नेवाः स्वायत्त राज्य घोषणाया निंतिं ख्वपय् जुयाच्वंगु तयारी

नेवाः स्वायत्त राज्य मंकाः संघर्ष समितिया आह्वान कथं नेवाः स्वायत्त राज्य नेपालमण्डल घोषणाया निंतिं थीथी थासय् थीथी कथंया तयारी जुयाच्वंगु दु। थ्व झ्वलय् नेवाः स्वायत्त राज्य मंकाः संघर्ष समिति ख्वप कचापाखें नं वइगु पुस ११ गते कुन्हु घोषणा याइगु नेवाः स्वायत्त राज्यया निंतिं थीथी कथंया तयारी शुरु जूगु दु। वंगु सनिवाः नेवाः स्वायत्त राज्य मंकाः संघर्ष समिति ख्वपया ग्वसालय् न्हापांगु चरणया तयारी ज्याझ्वः कथं स्काउट भवन लाय्कुलिइ बुद्धिजीवीतय् मुँज्या यानाः सहलह यात। उगु ज्याझ्वलय् नेवाः स्वायत्त राज्य मंकाः संघर्ष समितिया मू कजि नरेन्द्रभक्त हाडा मूपाहां कथं झाःगु खः। ज्याझ्वलय् वय्कलं नेवाः राज्य धायेवं नेवाःतय् ययथें याइगु मखु, झिंछगू जिल्लाय् नेवाः राज्य न्यनाच्वंगुलिइ च्यागू जिल्लाय् ताम्सालिङ राज्यनापं सीमा विभाजन यायेमाःगु कारणं यानाः तामाङ प्रतिनिधित नापं जानाः सहलह यायेमाःगु न्ह्यथनादिल। निगू राज्यया दथुइ ब्वलनीगु समस्यायात मंकाः रुपं निवारण यायेमाःगु खँय् बः बियादिसें वय्कलं पुस १ गते माओवादीं याइगु धाःगु नेवाः राज्य घोषणा ज्याझ्वलं नेवाः राज्ययात छुं मछिंकिगु मखुसें उकिं ग्वाहालि जुइगुलिं छुं अजू चायेमाःगु मदुगु व नेवाः राज्यया खँ स्वःगु सुका थें जुयाच्वंगु नं कनादिल ।

खः नं नेवाः राज्यया बारे जनतां थू नेतातय्सं मथू।
अझ धाये थुयाः नं मथू पहः यानाच्वंगु दु। थौं नेवाःतय् दथुइ जागरण वयाच्वंगु दु। अथे जुयाः भाषा म्वासाः जाति म्वाइया नारा तच्वया वयाच्वंगु दु। नापं थौं नेवाः राज्य दःसा जक नेवाःत दइ धइगु न्हूगु अवधारणा हये मालाच्वंगु दु। उकिया लागिं नं नेवाः स्वायत्त प्रदेशया घोषणा छगू ऐतिहासिक ज्या जुइगु खनेदु। थौंकन्हय् नेवाः स्वायत्त राज्य मंकाः संघर्ष समितिइ झिगू राजनीतिक घटकया जातीय संगठनं सहभागीता क्यनाः नेवाः स्वायत्त राज्यया मू अवधारणायात आत्मसात् याये धुंकूगु दु। छुं छुं अहम क्यनाः छुं याये मफयाच्वंगु राजनीतिक पार्टी हे जक उगु खँय् सहमत जुइ मफयाच्वंगु दनि। छुं ई लिपा उपिं नं उगु सही लँपुइ मवसें गाःगु धाःसा मखुनि। नेवाः राज्य दःसा जक नेवाःत दइ, नेवाः संस्कृति दइ धइगु मू मान्यता ज्वनाः थौं नेवाः स्वायत्त राज्य घोषणाया तयारी जुयाच्वंगु दु। अथे जुयाः नं न्हापा न्हय्गू राजनीतिक पार्टीया जातीय घटकत जानाः शुरु याःगु थुगु नेवाः स्वायत्त राज्य मंकाः संघर्ष समितिइ कांग्रेस, एमाले व माओवादीया जातीय घटक तकं दुथ्याये धुंकूगुलिं सहज जुयावःगु दु ।

नेपाःया अन्तरिम संविधानय् नेपाः संघीय गणतन्त्रय् वनेगु धकाः च्वये धुंकूगुलिं यानाः न्हापा गणतन्त्रया निंतिं गणतान्त्रिक मोर्चा दयेकू थें आः संघात्मक राज्यय् वनेगु हे जुल धइगु ग्यारेन्टीसाथ थुगु थीथी कथंया संघीय राज्य घोषणाया ज्याझ्वः न्ह्यानाच्वंगु खः। अन्तरिम संविधानं पारित यानातःगु उगु ज्यायात कार्यान्वयन यायेत अःपुकेगु निंतिं दबाव हे जक खः थ्व। थुगु घोषणा लिपा नं अनया गभर्नर सु यायेगु व सु सु गणराज्यया मन्त्री जुइगु धइगु छुं नं निर्धारण याइ मखुनि। राष्ट्रिय एकताया लागिं संघीयता आवश्यक जूगु ल्याखं नेवाःतय् आदिभूमि नेपालमण्डलय् नेवाः स्वायत्त राज्य घोषणाया तयारी कथं नेवाः स्वायत्त राज्य मंकाः संघर्ष समितिं वइगु पुस ११ गतेया न्हियात नेवाः स्वायत्त राज्य घोषणा यायेगु दिं क्वछिनातःगु खः। थथे स्वायत्त राज्य घोषणा यायेगु तरखर जुयाच्वंगु इलय् हे नेपाः स्वंगूगु बंगलादेश थें जुइगु ला मखुला धकाः आशंका नं याइपिं दु। जातीय राज्य धायेवं नेवाः जातिया जक तानाशाही चले जुइगु मखुसें मेमेगु जातिया संरक्षण यायेगु जिम्मा नं नेवाः जाति दुने नेवाःतय्सं हे याइगु ब्यवस्था खः।

नेवाः स्वायत्त राज्य मंकाः संघर्ष समितिया मू कजि नरेन्द्रभक्त हाडां ला आः नं संघीयताय् वनेगु निंतिं लिलिचिला च्वनेगु धइगु ला १२ बजे जूगुयात हाकनं लिखतं घौ चाःहीकाः ११ बजे यायेत स्वयेगु थें असम्भव खँ जक खः धयादीगु दु। नेपाली धायेवं हे थीथी भाषा भाषि जातजाति दइगु जुयाः उकिं मध्ये नं नेवाः जाति सुसंस्कृति व सभ्य धयातःगुयात ल्वयेक न्हापां नेवाः राज्यया घोषणा यायेत्यंगु खः। उकिया लागिं वइगु पुस ११ गते लखौं मनूत येँय् दशरथ रंगशालाय् क्वकायेमाःगुलिं यानाः १००० म्ह ला सुरक्षा दस्ता जक बन्दोबस्त यायेगु तयारी जुयाच्वंगु दु। नेवाः भोलेन्टेयर्सं उकी ग्वाहालि यानाच्वंगु दु। छुं नं हालतय् नेवाः स्वायत्त राज्य नेपालमण्डलया घोषणा यानाः उकियात कायम यायेगु निंतिं थौं नेवाःत हे सचेत व संगठित जुइमाःगु अवस्था वयाच्वंगु खँय् ख्वपय् जूगु नेवाः स्वायत्त राज्य घोषणा बारे तयारी ज्याझ्वलय् न्ववानादीपिं वक्तातय्सं अभिब्यक्त यानादीगु खः। न्हापां माओवादीं थ्वयेकूगु नेवाः स्वायत्त राज्यया नारा थौं एमाले व नेपाली कांग्रेसं नं माने यानाः सहमति याये धुंकूगुलिं यानाः थ्व राज्यया प्राप्तिइ आशंका तना वने धुंकूगु दु। तर आः नं छुं महिताःतय्सं थुकिया विरोधय् ज्या यानाच्वंगु खने दयाच्वंगुलिं उकी दुने नं छुं षडयन्त्र जुइफुगु सम्भावना धाःसा दनि। थ्व संघीय राज्यया निर्माण यायेगु मयायेगु धइगु झीगु जीवन मरणया सवाल खः, अथे जुयाः नं थौं संविधानसभापाखें चूलायेत्यंगु महत्वपूर्ण अवसरयात प्राप्त यायेगु निंतिं थौंनिसें हे हरेक तवरं झी नेवाःत फुक्कं छप्पँ छधी जुयाः थःगु अघिकार प्रति सचेत व जागरुक जुइमाःगु अवस्था वयाच्वंगु दु ।

More Stories Like this