गृह व कानुन मन्त्रीयाके बयान
सुरक्षा परिषदया बैठक च्वन
येँ (सन्ध्या टाइम्स)/ व्यवस्थापिका संसदया महिला बालबालिका समाज कल्याण समितिं नीस्वनातःगु उपसमितिं अछामय् मिसाम्ह प्रहरीयात जूगु सामूहिक बलात्कार घटनायात कयाः थौं गृहमन्त्री भीमबहादुर रावल व कानुन मन्त्री प्रेमबहादुर सिंहयात सःताः बयान कायेत्यंगु दु।
वंगु छुं महिना न्ह्यः अछामय् न्हय्म्ह प्रहरीं थःगु हे क्षेत्रय् ज्या यानाच्वंम्ह छम्ह मिसाम्ह प्रहरी सुन्तली धामीयात चरेस दुगु ला नकाः सामूहिक बलात्कार याःगु खः ।
उगु घटनायात कयाः म्हिगः समितिं पीडित सुन्तली धामी व सुदुरपश्चिमय् ज्या यानाच्वंम्ह डीआईजी पार्वती थापायाके बयान काःगु खःसा डीआईजी थापां थःगु बयानया झ्वलय् अछामय् ज्या यानाच्वंम्ह एसएसपी ढकबहादुर कार्कीं मातहतया प्रहरी जवानतय्त कारवाही यायेगु पलेसा घटनायात त्वःपुइत स्वःगु द्वपं बिउगु खः ।
अथे हे सुन्तली धामीं थःत जूगु बलात्कारया घटनाया बारे यथार्थ खँ समितिइ न्ह्यब्वयेवं समितिं थौं गृहमन्त्री व कानुन मन्त्रीयात बयानया निंतिं सःतूगु खः ।
अछाम घटनायात कयाः प्रहरी संगठन दुने हे विवाद ब्वलनाच्वंगु खःसा दोषियात कारवाही यायेत डीआईजी थापां अडान कायेवं वय्कःयात थःगु कार्यक्षेत्रं लित सःतेगु निर्णय गृह मन्त्रालयं याःगु खः ।
थ्वहे झ्वलय् सुन्तली धामी प्रकरणया बारे गृहमन्त्रीयात समितिं बयानया निंतिं सःतेवं थौं सुरक्षा परिषदया बैठक च्वंगु दु ।
सिंहदरवारय् च्वनाच्वंगु बैठकय् गृह मन्त्रालय अन्तर्गतया स्वंगुलिं निकायया प्रमुखतय्सं ब्वति कयाच्वंगु दु।
अथे हे थौंया सुरक्षा परिषदया बैठकय् नेपाःया वर्तमान सुरक्षा स्थितियात कयाः नं सहलह जूगु खँ धाःगु दु ।
सुरक्षा परिषदया बैठक लिपा गृह मन्त्री भीम रावलं समितिइ वनाः थःगु बयान बीगु खँ नं स्रोतं धाःगु दु। थ्वयां न्ह्यः गृह मन्त्रालयं अछाम घटनायात कयाः खास हे चिउताः क्यना मच्वंगु खः ।
