एमालें अल्टिमेटम मबीगु जुल

सरकार त्वःतेमाः धाईपं नेतात क्रुद्ध

सरकारं यानाच्वंगु ज्याखँपाखें चित्त बुझे मजुयाः सरकारया नेतृत्व यानाच्वंगु पार्टी माओवादीयात चेतावनी सहित अल्टिमेटम बीगु धकाः एमालेया केन्द्रीय समितिं याःगु निर्णय आः लागू मजुइगु जूगु दु । एमालेपाखें आः माओवादीयात अज्याःगु छुं नं अल्टिमेटम मबीगु व मिले जुयाः सरकार न्ह्याकेगु धकाः सहमित दयेकूगु दु ।

माओवादीयात उगु चेतावनी सहितया ज्ञापनपत्र बीगु धकाः एमालें ईश्वर पोखरेलया नेतृत्वय् छगू कार्यदल समेत गठन यानाः बुँदात तयार याकूगु खः । उगु १२बुँदे ज्ञापनपत्रयात फयांफछि याकनं प्रधानमन्त्री प्रचण्डयात लःल्हायेगु व यदि उकी उल्लेख यानातःगु ई तकया दुने नं सरकारं थःपिनि सुझावयात
कार्यान्वयन मयात धाःसा सरकार हे त्वःतेगु धकाः समेत एमालें धाःगु खः । तर आः वयाः आकाझाकां उगु ज्ञापनपत्र सरकारयात मबीगु जुल धकाः एमाले पार्टीं धयाहःगु खँ न्यनाः एमालेया केन्द्रीय दुजःत अजूचाःगु खँ सीदुगु दु ।

सरकारयात अज्याःगु ज्ञापनपत्र बीमाः धइगु पक्षयाम्ह छम्ह केन्द्रीय दुजलं 'सन्ध्या टाइम्स'यात धाः कथं उकुन्हु गोदावरीइ एमाले व माओवादीया छुं वरिष्ठ नेतातय् दथुइ जूगु 'लाञ्च-वार्ता' लिपा थ्व ज्ञापनपत्र
मबीगु निर्णय जूगु खः । माओवादीया छु आश्वासनं यानाः एमालें ज्ञापनपत्र बीगु निर्णय हीकूगु खः थःपिंसं मसिउगु खँ नं वय्कलं कनादिल ।

आः थ्वहे वइगु २० गते च्वनीगु पार्टीया केन्द्रीय बैठकय् थ्व विषय पिहां वइगु जानकारी नं वय्कलं बियादिल । केन्द्रीय समितिं याना तयेधुंकूगु निर्णय दथुइ तुं हीकेगु अधिकार सुनां बिल धासें वय्कलं आः
केन्द्रीय बैठकय् हानं बबाल जुइगु खँ नं कनादिल ।

एमालें बीत्यंगु उगु ज्ञापनपत्रय् माओवादीया भातृ संगठनतय्सं याना‌च्वंगु अराजक ज्या बन्द यायेमाःगु, भातृ संगठन वाईसीएल भंग यायेमाःगु, माओवादीं कब्जा यानातःगु सर्वसाधारण जनताया छेँबुँ लित
बीमाःगु, सरकारं तयार याःगु शहीद घोषणा यायेमाःपिनि नांधलः खारेज यायेमाःगु, उद्योग, सांचार ख्यलय् जुयाच्वंगु सरकारी हस्तक्षेप बन्द यायेमाःगु आदि माग यानातःगु दु । लिसें सरकारं थुपिं ज्या गबलय् तक पूवंकेगु धकाः ठोस आश्वासन बीमाःगु व अबलय् तकया दुने माग पूमवंकल धाःसा सरकार त्वःतेगु धइगु खँ तकं उकी दुथ्याःगु खः । पार्टीं उगु ज्ञापन सरकारयात मबीगु निर्णय याःगुया कारण धाःसा सी मदुनि ।