राजधानी सरे जुइगु हल्लां जग्गाया भाः थहां वन
येँ (सन्ध्या टाइम्स)/देशय् संघीय व्यवस्था वयेधुंकल कि देय्या राजधानी येँदेशं चीकाः चितवनय् वइ धइगु हल्लां यानाः थौंकन्हय् चितवन जिल्लाय् जग्गाया भाः थहां वंगु दु। जग्गाया भाः थहां वनेगुया नापनापं अन जग्गाया कारोवार नं तसकं अप्वया वःगु खँ सीदुगु दु ।
राजधानी सरे जुइगु हल्ला वयेवं अन जग्गाया भाः थगुने स्वयां थगुने स्वयां प्यदुगं निसें झिदुगं तक थहां वनाच्वंगु खँ जग्गा कारोबारय् संलग्न मनूतय्सं धाःगु दु ।
न्हापा छुं छुं जक रजिष्ट्रेशन यायेत मनूत वइगु खःसां थौंकन्हय् न्हिं २५० निसें ३०० गू तक जग्गा रजिष्ट्रेशनया ज्या जुयाच्वंगु खँ अनया मालपोत ज्याकुथिं धाःगु दु। मालमोत ज्याकुथी थौंकन्हय् न्हापा स्वयां अप्वः हे भीड जुइगु नं जुयाच्वंगु दु ।
मालपोत ज्याकुथिं बिउगु जानकारी कथं थुगु दँया थ्व महिना तक अन ७८०० गू कित्ताकाटया ज्या जूगु दुसा थ्वपाखें करिब ८ करोड तकाया राजश्व मुंकेगु ज्या जूगु दु ।
थ्व जग्गा न्याये मीगु ज्याय् करिब ४ निसें ६ अर्ब तका दां लगानी जुयाच्वंगु खँ नं धाःगु दु। थुकी नं अप्वः यानाः बैंकतय्सं हे लगानी यानाच्वंगु दु ।
जग्गा कारोवार अप्वया वःथें भाः नं तसकं थहां वनाच्वंगु दु। चितवनया नारायणघाट व भरतपुर निगुलिं शहरय् थौंकन्हय् थी हे मफयेक जग्गाया भाः थहां वनाच्वंगु खँ व्यवसायीतय्सं धाःगु दु ।
जग्गा न्यायेगु मीगु थ्व कारोबारय् चितवन जक मखुसें थौंकन्हय् येँनं नं आपालं मनूत उखे वनाः ल्हाः तयाच्वंगु दु। येँयापिं जग्गा दलालतय्सं तकं ल्हाः तःवःगु खनाः नं अन जग्गाया ज्या याइपिं उत्साहित जुया वःगु खँ धाःगु दु।
जग्गाया भाः थहां वंगु थ्व ज्याया मुख्य कारण धाःसा राजधानी सरे जुइगु हल्ला हे खः धकाः धाःगु दु। राजधानी सरे जुइगु बारे आः तक गनं छुं औपचारिक ज्या जूगु मदुनि। थ्व खालि हल्ला व गफय् हे सीमित तिनि। तर जग्गा कारोवार याइपिंसं धाःसा थ्वपाखें लबः हे कायेगु शुरु यायेधुंकूगु दु ।
