सर्वोच्चय् उदारम्ह प्रधानन्यायाधीश
म्हिगः च्वंगु संवैधानिक परिषद्या बैठकं न्यायाधीश भाजु अनुपराज शर्मायात न्हूम्ह प्रधानन्यायाधीश नियुक्तिया लागिं सिफारिस यायेगु निर्णय याःगु दु। ताःई कानून व्यवसायीया रुपय् कार्यरत भाजु शर्मायात छुं दँ न्ह्यः तिनि सर्वोच्च अदालतया न्यायाधीश नियुक्त याःगु खःसा आः वरियताक्रम कथं वय्कःयात न्हू प्रधानन्यायाधीश नियुक्त जुयादीगु दु। नेपाली कांग्रेसया पृष्ठभूमि दुम्ह खयां नं अग्रगामी बिचाः, सरल स्वभाव व सफा चरित्रया कारणं वामपन्थीतय् दथुइ नं यःम्ह कानून व्यवसायी खः। लिसें २०५६ सालया जेष्ठ १८ गतेया हाकुगु न्हि मवयेकेगु लागिं वय्कलं नेपालभाषायात नं येँ मनपाया ज्याखँया भाषाया मान्यता बीमाः धकाः वहस यानादीगु कारणं वय्कः नेपाःया बहुभाषी वास्तविकतायात नं थूम्ह व्यक्तित्व खः धइगु सीदु ।
भाजु शर्मा थौं थज्याःगु इलय् वयाः प्रधानन्यायाधीश जुइत्यंगु दु गुगु इलय् देशय् न्हूगु संविधान तयार जुयाच्वंगु दु, देय् संक्रमणकालं न्ह्यानाच्वंगु दु अले राज्य पुनर्संरचनाया सन्दर्भय् सर्वोच्च अदालतयात नं पुनर्संरचना यायेमाः धइगु सः थ्वयाच्वंगु दु। खतुं भाजु शर्मा थः हे नं सर्वोच्च अदालतयात पुनर्संरचना यायेमाः धइगु बिचाः तइम्ह मनू खः। आः सर्वोच्च अदालत हे वय्कःया नेतृत्वय् वयेधुंकाः वय्कलं थ्व पुनर्संरचनाया ज्या गय् यानाः न्ह्याकादी धकाः सकस्यां मिखा ब्वयाः स्वइगु स्वाभाविक खः। उकिया नापं न्यायालय नं भ्रष्टाचारय् तक्यन,राजनीतिं प्रभावित जुयाच्वन धकाः द्वपं वयाच्वंगु इलय् सर्वोच्चया न्यायिक छबी बचे यायेगु लागिं वय्कलं गज्याःगु भूमिका म्हिती धकाः नं थ्व इलय् सकस्यां ध्यान बियाः स्वयाच्वंगु दु ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
