नारां मखु ब्यवहारं क्रान्ति यायेमाः

- दि. आर. खड्गे

झिदँ तक सशक्त संघर्ष यानाः गामं शहरय् वयाः बहुलदलवादी पार्टीत नाप सम्झौता यानाः चुनाव त्याकाः सत्ताय् वःम्ह नेकपा (माओवादी) पार्टीं सत्ता संचालन यानाः पार्टीया नीति सिद्धान्त व जनताया चाहना कथं ज्या यायेगु प्रतिबद्धता यानावःम्ह क्रान्तिकारी नेता प्रचण्ड आः वयाः आक्रोशित व निराश जुयावःगु खनेदु धइगु अनुमान जुयाच्वंगु दु । वंगु मंसीर २२ गते चितवन व धनगढीया विशाल जनसभाय् माओवादी पार्टीं नं जनताया भावना व चाहना अनुसारया ज्या यायेगु बातावरण मदुगुलिं सत्ताय् च्वनेगु वा मच्वनेगु धइगु खँय् दुविधा जुयाच्वंगु खँ प्रचण्डं जनताया न्ह्यःने हे सार्वजनिक रुपं धयादिल । विशाल सभाय् थ्व नं धयादिल कि न्हापा न्हापा देय् स्यंकाच्वंिपं सामन्ती व विदेशी शक्ति तत्वत खः । थ्व निगू शक्तियात ध्वस्त याये मफुतले देश विकास व जनताया कल्याण जुइ मखु धकाः धयाः जनताया सहानुभूति कयाच्वंम्ह माओवादी कम्युनिष्ट पार्टी खः । न्हापा एमाले नं झापाय् सशक्त संघर्ष यानाः चर्चाय् वःगु पार्टी खः । एमाले पार्टी नं संघर्षया नीतियात त्याग यानाः बहुदलीय पद्धितं देय् व जनताया कल्याण यायेगु धइगु नीति ज्वनाः चुनाव हे त्याकाः सत्ताय् थ्यनेधुंकूगु पार्टी खः । तर लिपा वनाः थ्व पार्टी नं जनताया इच्छा व आकांक्षायात पुरा यायेगु हिसाबं न्ह्याः मवँसे कुसी मोहलय् जक अप्वः फँसे जूगुलिं जनता केन्द्रित राजनीति यायेगु त्वःताः विदेशी शक्तियात लय्तायेकेगु राजनीति शुरु याःगु कारणं जनतां नं एमालेयात विश्वास यायेगु धमाधम म्हो हयाच्वंगु दु । तर एमाले पार्टीं धाःसा जनताया इच्छा व चाहना कथं थःिपंसं ज्या याये मफुगुया मू कारण नोकरशाहीतन्त्र विपक्षी पार्टीतय् घृणित राजनीति व विदेशी शक्तितय् षडयन्त्र खः धकाः द्वपं बीगु मयाः । उकिया अःखः माओवादी पार्टीं धाःसा थम्हं ज्या याये मफुगुया कारण नोकरशाहीतन्त्र सत्ताय् सहभागी जुयाच्वंपिं पार्टी व विपक्षी पार्टीया कुराजनीति खः धकाः सावर्जनिक रुपं हे स्पष्ट भासं धायेधुंकल । अझ ला ज्या याके मबिउपिं बिदेशी तत्व नं खः धकाः खुलस्त रुपं द्वपंबीगु ज्या नं थ्व पार्टीया नेतातय्सं यानाच्वंगु दु ।

झीगु धापू प्रचण्डया बिचाः गलत खः धइगु मखु । प्रचण्डया खँय् यक्व सत्यता दु । तर खँ छु धाःसां साधारण जनतां तकं मसिउगु खँ मखु कि थ्व देय्या पुलांपिं कर्मचारीतन्त्र धईपं विकासप्रेमी मखु । विपक्षी पाटीया ला धर्म हे जुल सत्तायात असफल यानाः थः न्ह्याः वनेगु । गन तक विदेशी सामन्ती शक्तिया खँ दु उपिं लाअथें हे देश विकासय् पंगः जुईपं जुल । थ्वया अर्थ विदेशीनाप स्वापू क्वातुके हे मजिउ धइगु मखु क्वातुकेमाः तर देय्यात घातक यायेगु हिसाबं स्वापू तयेगु ज्या धाःसा याये मजिउ । झीगु धापू थुलि जक खः । थनया नेतातय्गु संस्कृति हे जुइधुंकल विदेशी शक्ति नाप सम्झौता यानाः देय्यात घात यायेगु व थःगु स्वार्थ पूवंकेगु । थज्याःगु हे नीतियात सामन्ती अथवा दलाल राजनीति धाइ । थज्याःगु घातक सोचं मुक्त मजूतले देय् अन्धकारय् लानाच्वनी । जनतां तःधंगु आशा याःगु खः माओवादी पार्टीं देय् व जनताया कल्याण याइ ला धकाः । तर माओवादी नेतात नं ऐश आराम व सुविधाभोगी जुयावःगु खनाः धाःसा जनता अति हे निराश जुयाच्वंगु दु । माओवादी पार्टीं नं जनता व देशया उन्नति प्रगति याये थाकुल धयागु खँ स्वयम् उकिया अध्यक्ष प्रचण्डया म्हुतुं पिहां वयेधुंकल ।

शाहवंशीय जुजुयात वांछ्वयाः न्हूगु नेपाः दयेकेगु धकाः फुक्क पार्टी छप्पँ जुयाः आन्दोलन मार्पुत राजतन्त्र चीका छ्वत । तर जुजु मदुगु न्हूगु नेपाःया कल्पना धाःसा अःखः जुयाच्वंगु दु । अथे धयागु छम्ह तानाशाहीवंसां मेम्ह तानाशाही जुइगु म्हगसय् ब्वाँय् वनाः जनतायात अति दुःख कष्ट बीगु कासा जुयाच्वंगु दु । नेतातय्के सामन्ती अवशेष ल्यनाच्वंगु कारणं विचार भावना व प्रतिवद्धता याःसा थ्व फुक्क फय्गं आश्वासन जक जुयाच्वंगु दु । यदि नेतात इमान्दार व नैतिकता दुपिं खःसा नेतातय्सं विचार व नारा प्रचार याये न्ह्यः अति चिन्तन मनन व संवेदनशील जुयाः समग्र पक्ष व ब्यवहारिकतायात ध्यान बियाः जक नारा सार्वजनिक याइ । छाय् धाःसां सकली नेतां म्हुतुं छु धाइ व पूवंकां तुं त्वती । नेतातय्के इमान्दारी व नैतिकताया अभावं यानाः दंगु नारा बियाः जनतायात आकर्षित यायेगु कुतः जक यानाच्वनी । थज्याःगु गलत सोचयात हे सामन्ती सोच धाइ प्रचण्डया आक्रोशित व निराशाया भाषणं जनताया मन त्याके मफयाच्वंगु दु । जनता खालि सिद्धान्तनिष्ठ कर्तब्यनिष्ठ जनताप्रति जिम्मेवारी बहन याईपं नेतायात जक ययेकाच्वनी । भिंगु गुण दुपिं नेतातय्सं जक देशय् शान्ति विकास अमन चयन हयेगु कुतः याइ । आन्दोलन-२ पाखें वःपिं नेतातय्सं नं जनतायात प्रतिकुल जुइगु ज्या यानाच्वंगु खनेदु । शान्ति मखु अशान्ति विकास मखु विनाश जनतायात सेवा बीगु मखु पीडा बीगु जक राजनीतिक खेल जुयाच्वंगु खनेदु ।

यदि धाथें सच्चा क्रान्तिकारी खःसा क्रान्तिया शुरुवात थःगु छेँनिसें शुरु याना यंके फयेकेमाः । छेँया परिवारयात सामन्ती शैलीया जीवन त्याग याकाः साधारण जीवन पद्धति नाला कायेकेमाः । विश्वया ततःधंपिं नेतातय्सं साधारण जीवन उच्च विचारया विकास यानाः देय्या विकासं जनतायात सभ्य याना यंकी । झीथाय्या नेतात धाःसा सत्ता प्राप्त मजूतले क्रान्तिकारी जुयाच्वनी । जब सत्ता प्राप्त जुइ न्हापाया बचनयात ल्वःमंकाः सामन्ती स्टाइलया जीवन बिते यानाच्वनी । थज्याःगु शैलीं यानाः हे विदेशी शक्ति प्रलोभन क्यनाः फँस यायेगु खः । थथे जुयाः हे विपक्षी पार्टी जक मखु जनतां नं असहयोग याइगु खः ।

More Stories Like this