सगरमाथाय् च्वनेत्यंगु मन्त्रिपरिषद् बैठक

सगरमाथाया आधार शिविरय् वनाः मन्त्रिपरिषद् बैठक च्वनेगु खँ क्वःजिउगु दु। विश्व वातावरणय् वयाच्वंगु हिउपाः व उकिं नेपाः थेंज्याःगु देय्यात लायेफुगु लिच्वः बारे विश्वया ध्यान सालेगु ताः तयाः नेपाः सरकारं थ्व अजूचायापुगु ज्या यायेत्यंगु खः। खतुं थ्व स्वयां न्ह्यः सार्क लागाय् लाःगु देय् माल्दिभ्सं नं क्वाना वयाच्वंगु पृथ्वीया लिच्वः कथं समुद्रय् लः अप्वयाः थःगु देय् लखय् डुबे जुइन धइगु सन्देश विश्वयात बीगु लागिं छुं ई न्ह्यः तिनि समुद्रया क्वय् वनाः मन्त्रिपरिषद् बैठक च्वनेगु ज्या याःगु खः ।

विश्व वातावरणय् वयाच्वंगु थ्व हिउपाःपाखें नेपाःयात माल्दिभ्सया थेंज्याःगु समस्या मवःसां अथे हे ग्यानापुगु मेगु लिच्वः लाइगु खतरा धाःसा दु। खास यानाः हिमालया च्वापु नायाः खुसिया लः अप्वइगु खतरा नेपाःयात दु। हिमालया च्वापु नाइबलय् छखे उकिया आकर्षण म्हो जुयाः नेपाःया पर्यटन व्यवसाय प्रभावित जुइगु खतरा दुसा उकिया नापनापं खुसिइ लः अप्वयाः उकिं जःखः च्वंगु भूमि व गांयात बांमलाःगु लिच्वः लाकीगु खतरा नं उलि हे दु। नेपाः थेंज्याःगु चीधंगु गरीब देशं थज्याःगु विनाशयात पने फइगु ला ख हे मखु, लिसें नेपाः याकःचां पने फइगु विषय नं थ्व मखु। उकिं थुकिया निंतिं विश्व समुदाय, उकिसनं पृथ्वीयात थज्याःगु समस्यां ग्रस्त यायेगु ज्याय् मू भूमिका दुपिं विकासशील देय्तय् ध्यान साले हे माः। नेपालं यायेत्यंगु थ्व ज्यापाखें उकथं ध्यान सालेगुपाखे छुं भचा जूसां ग्वाहालि याइगु निश्चित दु। थ्व ज्याया लिच्वःपाखें धाथें छुं प्रगति जुल धाःसा उकिं नेपाः छगू देय् जक मखु पृथ्वी छगलंयात हे बांलाःगु लिच्वः लाकेगु ज्याय् योगदान जू वनीगु खँयात नं झीसं ल्वःमंके मजिउ ।

More Stories Like this