थौं बल्ल संवैधानिक परिषद्या बैठक

अनुपराज न्हूम्ह प्रधानन्यायाधीश

येँ (सन्ध्या टाइम्स)/सर्वोच्च अदालतया न्हूम्ह प्रधानन्यायाधीश कथं भाजु अनुपराज शर्माया नां सिफारिस जूगु दु। थौं सुथय् च्वंगु संवैधानिक परिषद्या बैठकं सर्वसम्मतं थ्व सिफारिस याःगु खः ।

वर्तमान प्रधानन्यायाधीश मीन बहादुर रायमाझी उमेरया हदबन्दीं यानाः अवकास कायेत्यंगुलिं न्हूम्ह प्रधानन्यायाधीश कथं भाजु शर्माया नां सिफारिस जूगु खः।
न्यादँ न्ह्यः तिनि वय्कः वरिष्ठ अधिवक्तापाखें छक्वलं हे सर्वोच्च अदालतया स्थायी न्यायाधीश जुयादीगु खः। वय्कः नांजाःम्ह व्यंग्यकार केशवराज पिंडालीया काय् खःसा कानून व्यवसाय वय्कः थः पाजु मदुम्ह अधिवक्ता मधु शर्माया कुतलं प्रवेश जुयादीगु खः ।

प्रजातान्त्रिक पृष्ठभूमियाम्ह खःसां अग्रगामी सोच तइम्ह जुयाः वय्कः वामपन्थीतय् नं यःम्ह मनू खः ।

देशय् राज्य पुनर्संरचनाया ज्या न्ह्यानाच्वंगु झ्वलय् वय्कः सर्वोच्च अदालतया नं संस्थागत रुपं हे अग्रगामी यायेमाः धइगु बिचाः तइम्ह खः। तर वय्कःया थ्व बिचाःयात कांग्रेसया हे अनुदारवादी वकिलतपाखें अवरोध वयेफुगु खँ वय्कःयात म्हसिउपिं कानून व्यवसायीतय्सं धायेगु याः।
कानून व्यवसायीतय् ख्यलय् वय्कःयात सरल व्यक्ति कथं कायेगु याः। बार एशोसियसनय् वासुदेव ढुंगाना अध्यक्ष जुयाच्वंगु इलय् वय्कः केन्द्रीय दुजः जुयाः ज्या यानादीगु खः ।

नेवाःतय् मित्र

यँ मनपां नेवाः भाय्यात नं ज्याखँया भाषा धकाः बिउगु मान्यताया विरुद्ध सर्वोच्च अदालतय् मुद्दा लाःबलय् भाजु अनुपराज शर्मां नेवाः भाय्या पक्षं वकालत यानादीगु खः। अबलय् वय्कः वरिष्ठ अधिवक्ता खः। फुक्क भाषायात समान अधिकार बीमाः धइगु उदार बिचाः तइम्ह व्यक्ति वय्कः खः। सर्वोच्चं अबलय् नेवाः भाय्या विपक्षय् २०५६ सालया जेठ १८ गते फैसला न्यंकूगु खः ।