जनजातितपाखें पुस १३ व १४ गते नेपाल बन्दया घोषणा
येँ (सन्ध्या टाइम्स)/ आदिवासी जनजाति वृहत् मोर्चा, नेपालं थ्वहे वइगु पुस १३ व १४ गते नेपाल बन्दया घोषणा याःगु दु ।
छुं न्हि न्ह्यः जक नीस्वंगु आदिवासी जनजाति वृहत् मोर्चा, नेपालं थौं छगू पत्रकार सम्मेलन यासें न्हापांगु चरणया संघर्षया ज्याझ्वः कथं दकलय् लिपांगु न्हि पुष १३ व १४ गते नेपाल बन्द यायेगु घोषणा याःगु खः ।
आत्मनिर्णयया अधिकार नापं जातीय स्वायत्तता व स्वशासनयात संविधानय् सुनिश्चित यायेमाःगु, नेपालं आदिवासी जनजातिया सवालयात कयाः गुलि नं अन्तर्राष्ट्रिय सन्धि सम्झौताय् ल्हाःचिं तयातःगु खः व फुक्कं कार्यान्वयन यायेमाःगु नापं थीथी कथंया माग तयाः मंसीर १९ गते तकया अल्टिमेटम बियाः न्हापांगु चरणया संघर्ष घोषणा याःगु खः ।
निन्हुयंकं नेपाल बन्द न्ह्यः न्हापांगु चरणया संघर्षया ज्याझ्वः ताःलाकेत मंसीर २१ गते देय्न्यंकं विरोध सभा, २८ गते सिंहदरवार घेराउ, ३० गते देय्न्यंकं १ घण्टा चक्का जाम, पुष ९ गते देय्न्यंकं जिल्ला प्रशासन ज्याकुथी धर्ना, पुष १२ गतेया दुने छन्हु संविधानसभा धर्ना, पुष १२ गते देय्न्यंकं मसाल जुलुस पिकायेगु ज्याझ्वः दयेका तःगु दु।
न्हापांगु चरणया ज्याझ्वः क्वचायेकाः नं थःपिनि माग पूरा मजुल धाःसा निगूगु चरणय् अझ कडा ज्याझ्वः पित बीत थःपिं बाध्य जुइ धकाः नं आदिवासी जनाजति वृहत् मोर्चां धाःगु दु ।
छुं न्हि न्ह्यः जक देय्न्यंकंया आदिवासी जनजातिया न्ह्यलुवापिं नापं न्यासःम्हं मल्याक जनजाति कार्यकर्तातय् छगू भेलां डा. कृष्ण बहादुर भट्टचनयात छ्याञ्जे ल्ययाः उगु मोर्चा नीस्वंगु खः। लिसें न्याम्ह दुजः दुगु मोर्चाया नायः पुचः नं दयेकूगु दु। उगु मोर्चां वंगु मंसिर ११ गते संविधानसभाया नायः सुवास नेम्वाङयात नापलानाः आदिवासी जनजातितय्सं ल्ह्वना वयाच्वंगु थीथी खँ नापं थःपिनि माग दुथ्याकाः छगू ज्ञापनपत्र लःल्हाःगु खः ।
मोर्चां प्रम माधव नेपालयात नं ज्ञापनपत्र लःल्हायेगु ज्याझ्वः दयेकूगु खःसां प्रधानमन्त्री ई मबिउगुलिं मोर्चां वंगु छुं दिं न्ह्यः प्रधानमन्त्री ज्याकुथी तुं थःपिनि ज्ञापनपत्र दर्ता याना थकूगु खः। थःपिंलिसे सरकारं यानातःगु सम्झौता छुं हे लागू मयाःगु खँय् जनजातित तम्वयाच्वंगु दु ।
