वायुसेवा निगमय् हानं विमान न्यायेगु काण्ड

नेपाल वायुसेवा निगमं निगः एअर बस न्यायेगु धकाः यानाच्वंगु तयारीयात संसदया सार्वजनिक लेखा समितिं आःया निंतिं पना बिउगु दु। एअर बस न्यायेगु ज्याया लागिं निगमं ल्ह्वनाच्वंगु पलाः पत्याः यायेबहः मजूगु व उकी गुलिखे थासय् शंका नं ब्वलनाच्वंगु दु धासें लेखा समितिं आःयात विमान न्यायेगु ज्या न्ह्यःने यंके मत्यनि धकाः पना बिउगु खः ।

नेपाल वायुसेवा निगम थौं तःधंगु हे जर्जर अवस्थाय् लानाः आः थ्व ध्वस्त हे जुइगु खः लाकि धइगु स्थितिइ थ्यनेधुंकूगु दु। उकिं थ्वं छुं नं तःधंगु ज्या याये धकाः कुतः यात धाःसा उकियात याउँक पत्याः यायेगु थाय् मदु। वास्तवय् निगमं आः निगः विमान न्याये धकाः पलाः न्ह्याकूगुया लिउने सुलाच्वंगु समस्या नं थ्वहे खः। खास यानाः बहुदलीय व्यवस्था वयेधुंकाः निगमय् निरन्तर जुयाच्वंगु राजनीतिक हस्तक्षेपं यानाः थ्व संस्थाया थुगु हविगत जूगु खः। थुकिया निंतिं निगम स्वयम्यात सिबें नं थुकियात दुरु बीम्ह सा थें व्यवहार याना जुइपिं राजनीतिक पार्टीतय्त दोष बीमाःगु खनेदु ।

तर निगम थ्व अवस्थाय् थ्यन धकाः उकियात थथे हे तुं याना तयेगु धाःसा पाय्छि मखु। थ्व संस्थायात न्ह्यःने न्ह्याकेगु नं सरकारया चिउताः दुगु खःसा उकिया लागिं माःगु वातावरण दयेका बी हे माः। छगू विमान सेवायात माःगु वातावरण धयागु वयाके दइगु उडान क्षमता हे जक खः। थःगु क्षमता अप्वयेकेगु लागिं निगमं न्हूगु विमान हयाः ज्या याये धकाः तयारी याःगु दुसा उकियात पनेमाःगु खने मदु। तर नेपालय् विमान न्यायेगु वा मन्यायेगु ज्याय् नं यक्व राजनीति जुइ। निगम थ्व राजनीतिं अझ नं मुक्त मजूनि ।

More Stories Like this