कन्सर्न नेपालया किपा व न्वचु धेंधेंबल्लाः

संयुक्त राष्ट्र संघया बालअधिकार महासन्धिइ नेपालं हस्ताक्षर याःगु नीदँ क्यंगु व न्हूदँ ११३० या लसताय् कन्सर्न नेपालं हनुमानध्वाखाय् 'शान्ति समृद्धि न्हूगु नेपाःया आज्जु' विषयय् मचा किपा च्वज्या अले 'न्हूगु संविधानय् मस्तय्गु अधिकार' विषयय् न्वचु कासा यात ।

पीगू स्कूलया २०० स्वयां अप्वः मस्तय्सं ब्वति काःगु उगु ज्याझ्वलय् झिदँनिसें झिंनिदँ तक अले १३ दँ निसे १५ दँ तक यानाः निगू भागय् विभाजन याःगु खः। १० दँ निसेँ १२ दँ तकयापिं मस्तय् दथुइ जूगु किपा कासाय् न्हाप सिरपाः मनिषा लामा निलबाराही स्कुलं त्याकल। लिउ सिरपाः अर्जुन कार्की नीलबाराही स्कुलं त्याकलसा लियांलिउ सर्गत शाक्य जेम्स स्कुलं त्याकल। अले हःपाः सिरपाः समर थापा जनप्रभात स्कुलं त्याकल ।

अथे हे १३ दँ निसेँ १५दँ तकयापिं मस्तय् दथुया कासाय् न्हाप सिरपाः सुजिता तामांगं त्याकल। लिउ सिरपाः कमल बलामी जनप्रभात स्कुलं त्याकलसा लियांलिउ सुवर्ण तामांगं जनप्रभात स्कुलं व हःपाः सिरपाः राहुल राई प्रज्ञाज्योती स्कुलं त्याकल। विशेष हःपाः सिरपाः प्रिया तामांग निलबाराही स्कुलयात व सुजन कार्की बालसेवा स्कुलयात बिउगु खः ।

उकथं हे न्वचु धेंधेंबल्लाः कासाय् प्रकृति वासुकला वासु सेकेण्डरी स्कूल ख्वपं न्हाप सिरपाः त्याकल। अथे हे पुष्पाञ्जलि श्रेष्ठ जगत सुन्दर स्कुलं लिउ व श्रेया मानन्धर स्वर्णिम स्कुलं लियांलिउ सिरपाः त्याकादिल। हःपाः सिरपाः अम्बिका महर्जन बाल मजदुर क्लब (अन्नत मंगल स्कुल) यात बिल ।

कन्सर्न नेपालया अध्यक्ष विजय सैंजूया सभापतित्वय् जूगु उगु ज्याझ्वः नेपाः राष्ट्रिय पार्टीया अध्यक्ष डा. केशवमान शाक्यं उलेज्या यानादीगु खः। किपा च्वज्या कासाया निर्णायक मण्डलय् वरिष्ठ कलाकार हरिप्रसाद वैद्य, कार्टुनिष्ट रविन साय्मि, ललित कला क्याम्पसया प्रमुख राजु मानन्धरपिं च्वनादीगु खः। न्वचु कासाया ल्यज्या पुचलय् कस्तुरी स्थापित, रमेशकाजी स्थापित व विजय सैंजु च्वनादीगु खः ।

कन्सर्न नेपालपाखें दँय्दसं थुकथंया ज्याझ्वः यायेगु याना वयाच्वंगु दु। ज्याझ्वःयात विविधता बीगु लागिं यलय् व ख्वपय् नं थ्व ज्याझ्वः यायेधुंकूगु दु। कासापाखें नेवाः मस्तय्त सार्वजनिक थासय् वयाः न्ववायेगु आत्मबल बल्लाकेगु ज्याय् तिबः बिया वयाच्वंगु खनेदु ।

More Stories Like this