विमान मन्यायेत निर्देशन
लेखाया निर्देशनं नेपाल वायुसेवा निगम हिस्स
येँ (सन्ध्या टाइम्स)/व्यवस्थापिका संसदया सार्वजनिक लेखा समितिं न्हूगु विमान न्यायेगु प्रक्रिया तत्कालया लागिं न्ह्यःने मन्ह्याकेत नेपाल वायु सेवा निगमयात निर्देशन बिउगु दु ।
समितिया थौं सुथय् च्वंगु बैठकं तत्काल विमान न्यायेगु प्रक्रिया न्ह्याके मतेनि धकाः निगमयात निर्देशन बियागु खँ लेखा समितिया सभापति रामकृष्ण यादवं पत्रकारतय्त कनादिल ।
विमान न्यायेगु बारे अध्ययन जुयाच्वंगु इलय् निगमया पदाधिकारीतय्सं लाथेपाथे वक्तव्य पिकयाः लेखा समितिया अपमान याःगु निष्कर्ष पिकासें आवंलि पत्रिकाय् न्वमवायेत नं पदाधिकारीतय्त बैठकं निर्देशन बिउगु दु ।
बैठकं थ्वहे वइगु मंसिर १५ गते नेवानियाके, १६ गते कर्मचारी संचय कोषयाके, १८ गते विज्ञतलिसे व १९ गते अर्थ मन्त्रालयया अधिकारीतलिसे विमान न्यायेगु प्रक्रिया बारे सहलह यायेगु निर्णय नं याःगु दु ।
वंगु वालय् च्वंगु समितिया बैठकय् विमान न्यायेगु प्रक्रिया सम्बन्धी लिखित भ्वं उपलब्ध मयाःगुलिं समितिं निगमया पदाधिकारीतय्त थौं हाकनं बैठकय् सःतूगु खः। समितिं थौंया बैठकय् पर्यटन मन्त्रालयया सचिव नगेन्द्र घिमिरे, नेवानिया कार्यकारी अध्यक्ष सुगतरत्न कंसाकार व महाप्रबन्धक केबी लिम्बुयाके न्यनेकने याःगु खः ।
निगमं युरोपेली कम्पनीपाखें निगः एयर बस न्यायेगु प्रक्रिया न्ह्याकेवं उकिया पारदर्शिताया सम्बन्धय् शंका पिहां वयेवं लेखा समितिं निगमयाके न्यनेकने याःगु खः। निगमं १० अर्ब पुलाः विमान न्यायेगु तयारी शुरु याःगु खः। थुकी लेखा समितिं न्यनेकने यायेवं निगम पदाधिकारी व लेखाया दुजःतय् दथुइ आरोप प्रत्यारोप समेत जूगु खः ।
लेखा समितिं ३ अर्ब पुँजी दुसां १ अर्ब तका त्यासा कयातःगु नेवानिं मेगु १० अर्ब त्यासा कयाः विमान न्यात धाःसा उकिया ब्याज गय् यानाः पुलेगु व द्याःत्याःया ल्याःचाः गथे जुइ धकाः न्यनेकने याःगु खः ।
लिसें लेखा समितिं नेवानियाके थौंकन्हय् १ करोड तका बराबरया बोइङ्ग विमानया पार्टपूर्जा दु तर निगमं धाःसा बोइङ्ग मन्यासे एअरबस न्यायेत्यंगुलिं नं लेखां स्पष्टीकरण काःगु खः। उखे नेवानिं धाःसा तत्काल विमान मन्यात धाःसा नेपाल भ्रमण वर्ष नं प्रभावित जुइगु खँ धाःगु दु ।
निगमं कर्मचारी संचय कोषयाके त्यासा कयाः थ्व विमान न्यायेत्यंगु खःसा थुकिया लागिं बैना नं बीधुंकूगु दु ।
