एमालेय् जातीय स्वशासनया विरोध

ताःहाकःगु जनयुद्ध व जनआन्दोलनया लिच्वः कथं देशय् राज्य पुनर्संरचना जुयाः वयेत्यंगु संघीय व्यवस्था व थ्व मार्फत सदियौंनिसें उत्पीडनय् लानाच्वंपिं आदिवासी जनजातितय्त जातीय स्वशासन बीगु धकाः वःगु अवधारणायात सत्तारुढ पार्टी नेकपा (एमाले)या छुं वरिष्ठ नेतातय्सं पार्टी दुने विरोध यानाच्वंगु खँ सार्वजनिक जूगु दु। एमाले नेतातय्सं खास यानाः थःगु पार्टीया राजनीतिक सिद्धान्त जुयाच्वंगु जनताको बहुदलीय जनवादलिसे थ्व विषय मिले मजू धइगु तर्क बिसें जातीय आधारय् जुइगु संघीय व्यवस्थाया विरोध याःगु जुयाच्वन ।

थ्व इलय् संघीय प्रणाली व जातीय स्वशासनया विरोध यायेगु धइगु आन्दोलनया खिलाप जक मखु देशय् हानं मेगु जनयुद्ध ब्वलंकेगु कुतः नं खः। वस्तुस्थिति थूपिं व दिमाग थातय् लाःपिं सुं नं मनुखं थ्व इलय् थुकिया विरोध यायेगु सम्भावना मदु। यदि एमालेया जबजय् थ्व विषय मन्ह्यंगु खःसा जबजयात हे संशोधन यायेगु जक थुकिया छगूयां छगू जक उपाय खः। जबज गुगुं परिवर्तन हे याये मजिउगु धार्मिक ग्रन्थ मखु। जबज गुगु मार्क्सवादया लिधंसा कयाः सिर्जना यानातःगु खः, व मार्क्सवाद हे तःगू देशय् तःकथं परिवर्तन जुजुं वयाच्वंगु दु। एमालें जबज धइगु सिद्धान्त दयेकूबलय् देशय् थःगु हे कार्यकालय् सुनां सशस्त्र विद्रोह याइ, राजतन्त्र वनी, संघीय व्यवस्थाया सुत्रपात जुइ धकाः कल्पना तकं याःगु मदुनि। अय् जूगुलिं हिलावंगु परिस्थितियात आत्मसात यानाः आवश्यक जूसा जबजयात हे सुधार यायेगु जक एमालेया बुद्धिमानी जुइ। जबजया न्हिप्यं ज्वनाः देशय् वयाच्वंगु परिवर्तन हे पाय्छि मखु धया जुइगु शायद मुर्खताया पराकाष्ठा खः ।

More Stories Like this