देशय् वयेत्यंगु खाद्यान्नया संकट

भौगोलिक रुपं ठगे जुइकाः च्वनेमाःपिं पश्चिम नेपाःया जनतां आः याकनं हे खाद्यान्न संकटया सामना याये मालीगु ख्याच्वः राष्ट्र संघया छगू अंग 'ज्याया लागिं खाद्यान्न कार्यक्रम' पाखें सार्वजनिक याःगु दु। उगु लागाय् न्हापा हे नं नयेगु ज्वलंया अभाव जुयाः समस्या जुयाच्वनीगु खःसा थुगुसी मौसमया कारणं बाली बांलाः मजूगुलिं थ्व संकट अझ तच्वया वनीगु खतरा पिहां वःगु खः। उगु लागाय् खाद्यान्न मदयाः आः हे नं राष्ट्र संघया उगु निकायं विमान चार्टर यानाः खाद्यान्न यंके मालाच्वंगु दु। यदि थ्व अवस्थायात आः हे चिउताः तयाः समाधानया छुं उपाय पिमकायेगु खःसा अन नये मखनीगु (भोखमरी) समस्या सिर्जना जुइगु ख्याच्वः नं उगु निकायं बिउगु दु ।

नेपाःया पश्चिम लागा भौगोलिक रुपं दुर्गम जूगुलिं अन छुं नं सामान ल्ह्ययेत न्हापा हे नं समस्या जुयाच्वंगु दुसा उर्बर लागा मदुगुलिं नये त्वनेया नं उलि हे समस्या वयाच्वंगु खनेदु। तर थज्याःगु लागाय् नं गय् याःसा खाद्यान्न थेंज्याःगु अति आवश्यक ज्वलंया अभाव मजुइकेगु धकाः बिचाः यायेगु फुर्सद धाःसा सरकारया छुं हे निकाययाके मदु। थ्व इलय् सरकारया ध्यान जनताया समस्या समाधान यायेगुपाखे सिबें नं सत्ता समीकरणय् अप्वः केन्द्रित जुयाच्वंगुलिं भुखमरीं पीडित जनता नये हे मखंक सी मालीगु अवस्था वइगु खतरा वयाच्वंगु दु। आकाझाकां थज्याःगु खतरा वःसा ला उकियात पने थाकुइ धाये, तर अज्याःगु खतरा वइन धकाः न्ह्यव हे जानकारी बिलं नं उकियात वेवास्ता यायेगु खःसा थ्व ज्यायात जनता प्रति राज्यं क्यंगु दकलय् नीचस्तरया गैर जिम्मेवारी धायेमाली ।

More Stories Like this