ओलीपाखें स्वशासनया विरोध

एमाले पोलिटब्युरोय् थौं चर्काचर्की जुइगु

येँ (सन्ध्या टाइम्स)/सत्तारुढ पार्टी नेकपा (एमाले) या नेता केपी ओलीं संघीय व्यवस्था, जातीय स्वशासन आदि थेंज्याःगु खँ एमालेया निर्देशक सिद्धान्त जुयाच्वंगु जनताको बहुदलीय जनवादय् मदुगु कारणं थुकियात पार्टीं नाले मजिउगु दावी यानादीगु दु। जातीय स्वशासन थेंज्याःगु खँयात स्वीकार यानाः पार्टीं जनताको बहुदलीय जनवाद (जबज) यात तोडमरोड यायेत्यंगु द्वपं नं वय्कलं बियादीगु दु।
पार्टीया च्याक्वःगु महाधिवेशनं पारित याःगु राजनीतिक दस्तावेज खारेज यायेमाः धइगु माग यासें वय्कलं पार्टीइ दर्ता यानादीगु शुद्धि पत्रय् थ्व खँ उल्लेख यानातःगु दु।
उखे केपी ओलीं दर्ता यानातःगु थ्व शुद्धिपत्र ज्या लगे मजू धासें पार्टी उपाध्यक्ष वामदेव गौतमं मेगु संशोधन प्रस्ताव नं दर्ता यानातःगु दु। थौं च्वनेत्यंगु एमाले पोलिटब्युरो बैठकय् थुकिया बारे सहलह जुइत्यंगु दु ।

जबजया हवाला बियाः देशय् वयेत्यंगु संघीय व्यवस्थाया समेत विरोध याःगुलिं केपी ओली व वय्कःया गुटयात परिवर्तन विरोधी धकाः पार्टी दुने द्वपं बियाहःगु खँ नं सीदुगु दु। एमालें उकुन्हु बल्ल बल्ल संविधानसभाया राज्य पुनर्संरचना समितियात लःल्हाःगु राज्य पुनर्संरचना सम्बन्धी अवधारणायात तकं संशोधन यायेमाः धकाः ओली पुचलं माग यानाच्वंगु दु। संविधानसभाया समितिपाखें तसकं ताकेता यानाहःगुलिं एमालें उकुन्हु उगु अवाधारणा बुझे याःगु खः। तर ओली अबलय् न्हूदिल्ली वनाच्वंगु जुयाच्वन। थः देशय् मदुगु इलय् बुझे यानातःगु अवधारणा स्वीकार याये फइ मखु धासें ओलीं उकी संशोधनया माग यानाच्वंगु खँ सूत्रं धाःगु दु ।

सूत्रं दावी याः कथं पार्टीया महाधिवेशन लिपा केपी ओली न्हापांखुसी न्हूदिल्ली वनाः लिहां वयेवं पार्टीया विधान संशोधन याये माल धकाः प्रस्ताव तयादीगु खः। लिपा निक्वःगु दिल्ली भ्रमणं लिहां वयेवं पार्टीया राजनीतिक दस्तावेज संशोधन यायेमाल धकाः प्रस्ताव तयादीगु खः।
थ्वहे झ्वलय् देय्या वर्तमान राजनीतिक अवस्थाया विश्लेषण यासें पार्टी अध्यक्ष झलनाथ खनालं यदि माल धाःसा पार्टीं सरकारया नेतृत्व त्वःतेमाः धयातःगु खँय् नं ओली पुचलं कडा विरोध यानाच्वंगु दु। वामदेव गौतमं धाःसा राष्ट्रिय सरकार मदयेकुसे बहुमतीय प्रणाली कथं सरकार दयेकूगुलिं थुकी एमाले च्वने मजिउ धइगु तर्क थःगु संशोधन प्रस्तावय् तयादीगु खँ सीदुगु दु ।