वार्ता मजूसा ध्वाँय् च्याकीगु

पहाडीतय्त जनकारवाही यायेगु ख्याच्वः


जनतान्त्रिक तराई मुक्ति मोर्चाया अध्यक्ष ज्वाला सिंहं थःपिं सरकारलिसे वार्ता यायेत तयार दु धासें तर थःपिंसं शर्त स्वरुप सरकार समक्ष तयाःगु माग छवाःया दुने पूमवंकल धाःसा नेपाःया राष्ट्रिय ध्वाँय् च्याकेगु समेतया संघर्ष कार्यक्रम न्ह्याकेगु घोषणा याःगु दु ।

ज्वाला सिंह पुचलं सरकारलिसे वार्ता यायेगु लागिं सरकारं कुनातःपिं थः स्वम्ह नेतातय्त त्वःतेमाःगु माग न्ह्यःने तःगु दु । नापं माओवादीं कब्जा यानातःगु तराईया जनताया छेँबुँ लित बीमाःगु माग नं उगु पार्टीं यानाच्वंगु दु । यदि थुपिं माग पूमवंल धाःसा तराई लागाय् हानं आन्दोलन न्ह्याकेगु ख्याच्वः नं बिउगु दु ।

ज्वाला पुचलं आः घोषणा यानातःगु ज्याझ्वलय् अतिकं कडा व राष्ट्र विरोधी कार्यक्रम समेत न्ह्यथनातःगु दु । ज्वाला पुचःया ज्याझ्वलय् यदि छवाःया दुने वार्ता मजुल धाःसा थ्वहे वइगु पुस २५ गते नेपाःया राष्ट्रिय ध्वाँय् च्याकेगु कार्यक्रम दु । अथे हे पुस ३० गते पहाडी राज्यसत्तँया प्रतीक दयेकाः पुतला च्याकेगु व माघ ५ गते तराई लागाय् तयातःगु फुक्क हे पहाडी व्यक्तित्वतय्गु झ्वाता ध्वस्त यायेगु ज्याझ्वः नं उमिसं दयेकातःगु दु ।

उकथं हे माघ २० गते अन्तरिम संविधान च्याकेगु २२ गतेनिसें पहाडीतय् विरुद्ध जनकारवाही न्ह्याकेगु २८ गते शहीदप्रित श्रद्धाजलि देछायेगु व चैत्र ४ गतेनिसें हानं तराई बन्द यायेगु ज्याझ्वः नं घोषणा यानातःगु दु ।

ज्वाला सिंह पुचलं सत्ताय् दुपिं मधेशवादी दलतय्सं नं मधेशी जनतायात धोका बिल धकाः द्वपं बिउगु दु । पुचःया नायः भाजु ज्वाला सिंहं छगू मधेशी पत्रिकायात अन्तर्वार्ता बिसें मधेशया आन्दोलनकारीत लिसे सरकारं याःगु सहमति तकं लागू मयासे सत्ताय् लिप्त जुयाच्वंगु द्वपं बियादीगु दु ।

वय्कलं धयादिल, 'सरकारय् वनेधुंकाः माओवादीं कब्जा यानातःगु छेँबुँ लित बीगु ज्याय् तकं मधेशवादीदलतय्सं चिउताः मतः ।'

सरकारं तराई लागाय् सशस्त्र आन्दोलन याना वयाच्वंगु पुचःत लिसे वार्ता यायेगु धकाः आह्वान याःगु सकारात्मक खःसां थःपिंसं न्ह्यब्वयागु न्यूनतम शर्त पूमवंकूतले थःपिंसं धाःसा वार्ता मयायेगु खँ नं वय्कलं धयादीगु दु ।

सरकारं थःपिंलिसे वार्ता यायेगु खःसा ज्वनातःपिं थः स्वम्ह नेतायात त्वःतेमाःगु मागयात उगु पुचलं प्रमुख शर्तया रुपय् न्ह्यःने हःगु दु । उगु पुचलं दयेकूगु वार्ता समितिया न्याम्ह दुजःत मध्यय् स्वम्ह वहे कुनातःपिं नेतातय्त दुथ्याकातःगुलिं उमित त्वःतेमाःगु अनिवार्य जूगु खँ नं धाःगु दु ।