नेपालय् नये मखनीगु खतरा

विश्व खाद्य कार्यक्रमपाखें न्ह्यव चेतावनी

येँ (सन्ध्या टाइम्स)/वइगु छुं महिनाया लिपा नेपालय् तःधंगु भोकमरीया स्थिति वयेफुगु खँ संयुक्त राष्ट्रसंघया विश्व खाद्य कार्यक्रमं धाःगु दु ।

संयुक्त राष्ट्र संघ विश्व खाद्य कार्यक्रमं छगू प्रतिवेदन सार्वजनिक यासें नेपालय् आः हे ३७ लाख मनूत भोकमरीं ग्रसित जुइधुंकूगु खँ धाःगु दु। प्रतिवेदनय् धयातः कथं नेपाःया पश्चिम लागा थुकिं बांमलाक प्रभावित जुइगु सम्भावना दु ।

उगु प्रतिवेदनया कथं नेपाःया स्थिति थुलि स्यनेधुंकल कि विश्व खाद्य कार्यक्रमं खाद्यान्न इनेगु निंतिं हवाईजहाज छ्यलाः खाद्यान्न इनाच्वंगु दु। खाद्यान्नया निंतिं हवाईजहाज छ्यलीगु विश्वया छुं छुं जक देय्त मध्ये नेपाः नं छगू लाः।
विश्व खाद्य कार्यक्रमया नेपाः प्रतिनिधि रिचार्ड रेगनं धयादी, 'जिमिके खुगः एमआई १७ व प्यंगः चिग्वःगु विमानत दु गुकिं न्हिं स्वीक्वः तक खाद्यान्न ढुवानी यानाच्वनागु दु।'
थुगु दँय् विश्व खाद्य कार्यक्रमं नेपालय् १० लाख टन नसा ज्वलं इनेगु ज्याझ्वः दयेकातःगु दु ।

वंगु चिकुलाया इलय् वा मवयाः छ्व व चिकुलाया बाली म्हो जक उत्पादन जूगुया लिसें बर्खाया इलय् नं यक्व लिपा जक वा वःगुलिं वा उत्पादन नं म्हो जूगु खः ।

थुकिं यानाः कृषिइ निर्भर जुयाच्वंपिं आपालं नेपाःमित प्रभावित जूगु खँ भाजु रिचार्ड रेगनं कनादिल। वय्कलं धयादी, 'वंगु न्यादँ निसें लगातार चिकुलाया इलय् खडेरी जुयाच्वंगु व हिउँदे बालीइ निर्भर जुयाच्वंपिं किसानतय् निंतिं थ्व जीवन व मृत्युया न्ह्यसः जुयाच्वंगु दु।'
वय्कलं न्ह्यःने धयादी, 'मनूतय् निंतिं वइगु न्हि अझ हाथ्यां जाइगु निश्चित दु ।'

विश्व खाद्य कार्यक्रमं सार्वजनिक याःगु उगु प्रतिवेदनय् लिबाक वा वःगुलिं ४० प्रतिशत परिवारयात गम्भीर लिच्वः लाकीगु अनुमान नं यानातःगु दु ।

थज्याःगु अवस्था वयाच्वंगु इतिहासय् हे न्हापांखुसी खः धासें नेपाः प्रतिनिधि रेगनं धयादी, 'छुं दँ थुखे न्हापांखुसी नेपालय् नसा ज्वलंया उत्पादन माग स्वयां स्वंगू निसें प्यंगू लाख मेट्रिक टनया ल्याखं म्हो जुइगु अनुमान दु ।'

विश्व खाद्य कार्यक्रमया उगु प्रतिवेदनय् धयातः कथं खाद्यान्न संकट अप्वया वनेगुली मौसम जक दोषी मखु विश्वव्यापी रुपं नसा ज्वलंया भाः थहां वंगुलिं नं थज्याःगु संकट तच्वया वंगु खः ।