नेवाःतय् मंकाः संघर्ष

आः नेवाःतय् बिस्कं स्वायत्त राज्य दयेकेया लागिं सम्पूर्ण नेवाः खलः पुचःत जानाः नेवाः स्वायत्त राज्य मंकाः संघर्ष समिति स्थापना जूगु सार्वजनिक घोषणा जुल । थ्व संघर्ष समितिपाखें आः नेवाःतय् राज्य पलिस्था यायेगु ज्याय् धाथें छुं याइगु खः लाकि धइगु आशा ब्वलंगु दु । पूर्वय् लिम्बुवानतय्सं लिम्बु राज्य स्थापना यायेमाः धकाः तःधंगु आन्दोलन थनाच्वंगु दु तराईलय् मधेशी राज्य स्थापना यायेमाः धकाः आन्दोलन जुयाच्वंगु दु । तर देय्या केन्द्रय् च्वंपिं जुयां नं नेवाःतय्सं धाःसा छुं याये फयाच्वंगु मदुनि । अःखतं नेवाःतय्सं प्यखेरं पेले यायेगु ज्या जक जुयाच्वंगु दु । थज्याःगु निराशाया इलय् पलिस्था जूगु थ्व संघर्ष समितिं आः छुं यानाः क्यना बीगु खः लाकि धकाः झीसं आशा याये फइगु जुयाच्वंगु दु । तर थ्व संघर्ष समिति सुं व्यक्तिया लागिं जक धाःसा जुइ मजिउ । लिसें गुगुं खलःया स्वार्थ पूवंकेगु लागिं जक नं जुइ मजिउ । थ्व मुक्कं नेवाःतय् मुक्तिया लागिं जुइमाः । खालि संस्था दयेकाः पद जक धारण यानाच्वनेगु ज्या नं थुकिं याये मजिउ । मुख्य खँ ज्या यायेमाःगु दु । संघर्ष समिति धासेंलि संघर्ष यायेगु थुकिया मुख्य ज्या खः । नेवाःतय्त सतकय् क्वकायेगु राज्ययात दवाव बीगु राजनीतिक पार्टीतय्त बाध्य याकेगु थुकिया मुख्य ज्या जुइमाःगु दु । सुभाय् ।

- के. आर., येँ ।

More Stories Like this