राज्य पुनर्संरचनाय् कांग्रेसया समस्या

संविधानसभाया राज्य पुनर्संरचना सम्बन्धी समितियात नेपाली कांग्रेसं आः तक अवधारणा मबिउनिगु कारणं अन्ततः समितिं कांग्रेसयात अल्टिमेटम सहित अन्तिम मौका बिउगु समाचार पिहां वःगु दु। राज्य पुनर्संरचना समितियात खास यानाः नेपाली कांग्रेस व एमालें थःपिनि अवधारणा उपलब्ध मयाःगु कारणं समितियात थःपिनि मस्यौदा तयार यायेत हे थाकुयाच्वंगु खः। एमालें बल्लबल्ल अवधारणा बिल तर कांग्रेसं अझ नं मबिउनि। संविधानया मस्यौदा तयार यायेगु ई न्ह्यःने थ्यनेधुंकल तर तःधंगु धाःगु पार्टीतय्सं हे थ्व सम्बन्धी अवधारणा आः तक मबिउनिगु कारणं समितियात समस्या जुयाच्वंगु खः। यदि समितिं आः बिउगु मिति तकया दुने नं कांग्रेसं अवधारणा मबिल धाःसा समितिं कांग्रेसया अवधारणा दुमथ्याकुसे हे थःगु मस्यौदा तयार यायेमाःगु अवस्था वइ ।

राज्य पुनर्संरचनाया अवधारणा तयार यायेत कांग्रेसयात थाकुइगु स्वाभाविक नं खः। छाय्धाःसां राज्य पुनर्संरचना कांग्रेसया एजेण्डा मखु। अझ धायेगु खःसा कांग्रेस थुकिया विरोधी खः। कांग्रेसं गबलें नं नेपाली समाज व राज्य सत्तायात आमूल रुपं हीकेगु आवश्यकता मखंकू। बरु अज्याःगु आमूल परिवर्तनया आवश्यकता खंकीपिंत वं आलोचना जक याइगु खः। थौं थःपिंसं हे थ्व आमूल परिवर्तनया खाका तयार यायेमाःबलय् कांग्रेसयात थाकुयाच्वंगु दु। कांग्रेसयात अथे याये थाकुयाच्वंगुया छता कारण मेपिंसं पेश यानातःगु हिउपाःया खाकाया व विरोधी जूगुलिं नं खः। जनताया चेतनास्तर आः यक्वं थहां वनेधुंकूगु कारणं कांग्रेसं व स्वयां कुहां वयाः राज्य पुनर्संरचना खाका दयेकेगु उचित जुइ मखु ।

More Stories Like this