मिस नेवाः जुइपिं ३६ म्ह नेवाःनी

न्याक्वःगु मिस नेवाः - २०१० थ्वहे वइगु पुस १५ गते नेपाल प्रज्ञा प्रतिष्ठानया हल कमलादीइ याइगु जूगु दु। उकिया लागिं स्वीखुम्ह नेवाः मिस्त ल्ययेगु ज्या नकतिनि पूवन। स्वनिगः दुने व स्वनिगलं पिनेया ८९ म्ह नेवाः मिस्तय्सं थुकी ब्वति कायेत आवेदन दर्ता याःगु खः। उकी न्हापांगु चरणय् ५२ म्हेसिया नां ल्ययेधुंकाः वयां लिपा जजतय् छगू पुचलं मुक्कं स्वीखुम्ह प्रतियोगी ल्यःगु खः। आः उमित मंसीर १५ गतेनिसें लछि तक मल्ल होटेलय् तालिम शुरु यायेत्यंगु दु।
थुगुसी स्वनिगःया अप्वः प्रतियोगीत दुथ्याःगु दुसा स्वनिगलं पिने दोलखा, गोरखा, ताप्लेजुङ्ग, ओखलढुंगां वःपिं नेवाः मिस्तय्सं नं ब्वति काःगु दु। थुगुसी वःपिं आपालं मिस्तय्सं नेवाः भाय् सः। मसःपिं नं उतिकं दु। अय्नं तालिमया दौरानय् उमिसं नेवाः भाय् नं सयेकी।
ग्वसाः खलः नेपलिज फेशन होमया प्रमुख हेमा मानन्धरं 'सन्ध्या टाइम्स'यात कनादी कथं थौंकन्हय् न्हूगु पुस्ताया नेवाःतय्सं नेपालभाषा ल्हाये मसःगुया दोष उमि अभिभावकत हे खः। फयांफछि लछि तक नेपालभाषा स्यनाः उमित नेपालभाषा थुइगु तक याये फइगु वय्कःया अनुभव दु ।

लछि तकया तालिमय् थ्व स्वीखुम्ह नेवाः मिस्तय्त नेपालभाषा, नेपाल संस्कृति, नेपाल लिपि, नेवाः वसः पुनेगु तरीका नापं थीथी नेवाः जाति बारे ध्वाथुइकेगु ज्या जुइ। थुलिया दुने उमिसं नेवाः भाय् पूवंक हे सयेकी धकाः ला धाये मफु अय्नं उमिसं थुगु भाषाया महत्व बारे धाःसा यक्वं खँ सयेकीगु दावी वय्कःया दु ।

झिंखुदँनिसें नीनिदँ तकया नेवाः मिस्तय्सं थुगु कासाय् थःगु प्रतिभा न्ह्यब्वइ ।

न्हापा न्हापा थ्व स्वयां नं अप्वः हे नेपालभाषा ल्हाये मसःपिं मिस्त सहभागी जुइगु थासय् थुगुसी अथे मजू। अथे खःसां असनय् च्वनाः नं नेपालभाषा ल्हाये मसःपिं मय्जुपिं नं थुकी सहभागी धाःसा जुयाच्वंगु दु ।

तालिमय् राजु नापितं लछि यंकं हे नेपाल लिपि स्यनादी। अथेहे भाइराजा तुलाधरं नेवाः संस्कृतिया कक्षा कयादीत्यंगु दु। पत्रकार डब्बु क्षेत्रीं प्रश्नाबली बीगु इलय् उकिया लिसः गय् यानाः बीगु धइगु तालिम बियादी। नापं कोरियाग्राफर रोहिया महर्जनया डान्स तालिम नं लछि यंकं हे न्ह्याइ। लछि तकया थुगु तालिमया झ्वलय् मनकामना व नेवाःतय् पुलांगु बस्ती दोलखाया अध्ययन भ्रमण नं याकीगु जूगु दु ।

सन् २००३ य् नेपाःया थीथी कला संस्कृतिया संरक्षण यायेगु ताः तयाः नेपलिज फेशन होम चायेकूगु खः। उगु संस्थां मिसा नेवाः नापं लिटिल नेवाः, टिन गुरुङ, टिन शेर्पा लगायतया कासात याना वयाच्वंगु दु ।

थःपिनि ज्याझ्वलं मीस तामाङ ल्यःम्ह मिसायात तामाङतय्सं न्ह्याथाय् वंसां सम्मान व आदर याःगु लुमंकुसें नेवाःतय्सं धाःसा अज्याःगु चलन मयाःगु खँय् मय्जु हेमा मानन्धरं खिन्नता प्रकट यानादिल ।

थुगुसीया कासा न्हापा स्वयां अलग्ग जुइगु वय्कःया दावी दु। उकिया लागिं न्हापा मिस नेवाः जुयाः थीथी क्षेत्रय् लगे जुयाच्वंपिं सुप्रिया तुलाधर, सुविधा प्रधान, आकाशा बज्राचार्यपिंसं नं तालिमय् हौसला बीगु ज्या जुइ ।

सुप्रिया तुलाधर थौंकन्हय् इमेज च्यानलय् लगनशील जुयाः ज्या यानाच्वंगु दुसा सुविता प्रधान ग्रायण्ड होटेलया ब्यवस्थापन स्वयेगु ज्याया नेतृत्व यानाच्वंगु व आकाशायात नं थीथी थासं ज्या यायेगु अवसर चूलानाच्वंगु कारणं मिस नेवाः जुइधुंकाः थःगु करिअर विकासय् नं तिबः जू ।

करिब १२/१३ लाख दां बजेट फ्यानाः यानाच्वंगु थुगु कासाय् ब्यक्तित्व प्रदर्शन, फोटो जेनिक, फ्रेण्डशीप, अनुशासन, बेष्ट फेयर, बेष्ट स्क्रीन व बेष्ट स्माइल थेंज्याःगु थीथी इभेन्ट नापं फष्ट रनरअप, सेकेण्ड रनरअप यानाः सिरपाः बीगु व्यवस्था यानातःगु दु। कासाय् गनं छुं हे कथंया पक्षपात जुइगु पटक्क हे सम्भावना मदुगु दावी नं ग्वसाः खलःया दु ।

More Stories Like this