बजेट फेल यायेगु रणनीति
थः सभासद्त फुक्क मुंकेगु सरकारी कसरत
येँ (सन्ध्या टाइम्स)/ताःई निसें सदन अवरुद्ध यानाच्वंगु माओवादीं बजेट पारित याकेत स्वन्हुया निंतिं सदन ला चले याके बीगु जूगु दु, तर उकिया नापनापं सदनय् पेश जुइगु बजेट फेल यानाः सरकार क्वःथलेगु रणनीति नं दुनें दुनें दयेकाच्वंगु खँ विशिष्ट सूत्रतय्सं धाःगु दु ।
सरकारं पेश याइगु बजेट पारित जुइत सदनया बहुमत सभासदतय्गु भोट माः। छुं जुयाः ३०१ म्ह सभासद्या भोट मवल धाःसा सरकार अल्पमतय् लानाः राजीनामा बीमाःगु अवस्था वइ। माओवादीं सरकारयात बजेटय् अल्पमतय् लाकाःसां राजीनामा बीमाःगु अवस्था हयेगु रणनीति दयेकाच्वंगु खँ सूत्रं धाःगु दु ।
थौंकन्हय् सत्तापक्षया १६ म्ह सभासद्त देशं पिने लानाच्वंगु दु। अथे हे मेपिं छुं सभासद्त स्वनिगलं पिने नं लानाच्वंगु दु। थज्याःगु अवस्थाय् मेपिं छुं भचा सभासद्त सदनय् उपस्थित मजुल धाःसा बजेट पारित याइगु इलय् सरकार अल्पमतय् लाइगु सम्भावना दु ।
सूत्रया कथं सत्तारुढ सभासद्त म्हो जुयाच्वंगु थ्वहे मौकाय् लाकाः माओवादीं सरकारयात समर्थन यानाच्वंगु मेगु पार्टीयात छुं भचा सभासद् अनुपस्थित याकेगु विषयय् खँल्हाबल्हा शुरु याःगु दु। थौं न्हिनय् तक उगु कुतः ताःलाःगु मदुनिसां बहनीपाखें नाटकीय हिउपाः वयेफुगु दावी सूत्रं याःगु दु। सदनया परम्परा कथं ध्वनी मतं जक बजेट पारित याःसां जिउ। तर छुं जुयाः सदनय् सरकार अल्पमतय् लाःगु संकेत खने दयाः विपक्षीं मतदानया माग यात धाःसा मतदानं हे बजेट पारित याके माःगु जुइ ।
लुमंकेबहः जू, २०५१ सालय् तत्कालिन प्रधानमन्त्री गिरिजाप्रसाद कोइरालाया सरकार नं नीति तथा कार्यक्रमया निंतिं जुजुयात धन्यवाद प्रस्ताव मतदानया लिधंसाय् पारित याकेत्यंबलय् अल्पमतय् लानाः कोइरालां राजीनामा बीमाःगु खः ।
उखे बजेट पारित याकेगु सदनय् थज्याःगु खेल जुइफुगु सम्भावना खंकाः सरकारं नं माःगु होशियारी शुरु याःगु दु। सदनय् सत्तापक्षया सभासद्तय् म्हति मजुइमा धकाः बाजुरा वनाच्वंम्ह एमाले सभासद् शेरबहादुर कुँवरयात थौं हेलिकप्टरं येँय् हःगु दु ।
लिसें तटस्थ च्वनाच्वंम्ह नेमकिपायात नं बजेटया पक्षय् मत बीमाल धकाः थौं प्रम माधव नेपाल थः हे ख्वपय् वनाः नेमकिपाया अध्यक्ष रोहितयात इनाप यानादीगु दु। सदनं थौं बजेट पारित यायेत्यंगु दुसा कन्हय् छुं आर्थिक विधेयकत पारित यानाखतं सदनया अधिवेशन नं क्वचायेका छ्वयेगु तयारी यानाच्वंगु दु ।
