सत्ता केन्द्रित आन्दोलन ?

कृष्ण प्रजापति

नेपालय् न्ह्यागु नं पार्टीं थःपिनि सत्ता ताः ई तिके यायेगु व निरन्तर सत्ताय् प्यपुनाच्वनेगु रणनीति दयेकीगु कमजोरीं यानाः हे न्ह्याब्लें धइथें नेपाली जनता द्यायेमाःगु स्थिति वइगु खः। खय्त ला न्ह्यागु नं राजनीतिक पार्टीया अन्तिम उद्देश्य धइगु सत्ता कब्जा यायेगु व थःपिनि नीति लागू यानाः जनतायात शासन यायेगु जुइ। तर सत्ता ताके यायेगु नामय् जुइगु अस्वस्थ प्रतिस्पर्धां यानाः न्ह्याब्लें हे धइथें नेपाली जनता धाःसा आशां द्याका च्वनेमाःगु स्थिति वयाच्वंगु दु। आः नं नेपाली जनतायात छुं राहत बीगु स्वयां नं राजनीतिक सत्ता सुयागु ल्हातय् लाकेगु धइगु हे जक मान्यतां ताः ई निसें देशय् तःधंगु राजनीतिक दलतय् दथुइ अस्वस्थ प्रतिस्पर्धा न्ह्यानाच्वंगु दु। देशय् दकलय् तःधंगु राजनीतिक पार्टी जुयावःगु ल्याखं एकीकृत माओवादीयात हे थ्व इलय् सत्ता त्वःता बीमाःगु खः। तर बहुमत हये मफुगु ल्याखं आः सत्ता नं मिलिजुली जुइमाःगु माग कथं थन स्वंगूगु तःधंगु पार्टी एमालेया नेतृत्वय् मिलिजुली सरकार सञ्चालन जुयाच्वंगु दु। थ्व नं देशय् दकलय् तःधंगु खनेदुगु माओवादीयात पाच्य जुइ फयाच्वंगु मदु। अथे जुयाः नं आः न्ह्याथे यानाः नं सत्ता कब्जा यायेगु धारणाय् एकीकृत माओवादीं थीथी कथंया संघर्षया ज्याझ्वःत पित हयाच्वंगु दु ।

नेपाली कांग्रेसया सभापति व पुलांम्ह प्रधानमन्त्री गिरिजाप्रसाद कोइरालाया हे ग्राइण्ड डिजाइन कथं थुगु सत्ता कायम जूगु खँ सुयातं थुइका च्वने माली मखु जुइ। अथे जुयाः नं माओवादी अध्यक्ष प्रचण्डं प्रधानमन्त्री माधवकुमार नेपालपाखें मखु कि नेकां सभापति गिरिजाप्रसाद कोइरालापाखें हे जक देशय् निकास पिहां वइगु खँ सार्वजनिक रुपं न्ववानादीगु खः। धाथें हे गुकुन्हु सिंगापुरय् वासः याकाः गिरिजाप्रसाद कोइराला नेपालय् थ्यंकः देशय् हाकनं छक्वः न्हूगु हे ढंगया खँत राजनीतिक बृत्तय् पिहां वया बिउगु दु। सिंगापुर थ्यंक वनाः सभापति कोइरालायात नापलानाः लिहां वःगु इलय् माओवादी नेता प्रचण्ड एयरपोर्टंनिसें लय्लय् तायावःगु खंपिंसं आः तत्काल हे नेतृत्व परिवर्तन यानाः माओवादीया हे नेतृत्वय् न्हूगु राष्ट्रिय सरकार दयेकीगु खः ला धकाः आशा ब्वलंकूगु खः। तर जब सभापति कोइरालां थः हे नेपाः थ्यंक यथार्थ खँ पित हल नेपाली जनतायात हाकनं छक्वः अलमल याना बिल। खालि सत्ताया जःखः हे जक सकसितं भुले याकाः देशय् सु प्रधानमन्त्री जुइगु, छु पार्टीं शासन यायेगु व गुकथं देश चले जुइगु धइगु थेंज्याःगु कौतुहलता ब्वलंकाः अलमल व रणभुल्ल जक याकाः देशय् दकलय् महत्वपूर्ण विषय न्हूगु संविधान तयार यायेगु ज्यायात गौण यायेगु परिपाटी शुरु जूगु दु। न्ह्यागु हे जूसां संविधान व कानून कथं देश चले जुइमाःग खः। तर थन संविधान हे तयार याये मफुगु स्थिति ब्वलनाच्वंगु दु। अझ आः किटान यानातःगु इलय् दकलय् न्हूगु संविधान तयार याये मफइगु स्थिति तकं ब्वलनाच्वंगु दु। इलय् न्हूगु संविधान तयार याये मफइगु स्थितिइ देशय् छु गज्याःगु समस्या ब्वलनी धइगु सोचे याये तकं थाकुगु विषय जूगु दु। थ्व गम्भीर स्थिति ब्वलंगुली नं देशय् तःधंगु राजनीतिक पार्टीया उलि हे तःधंगु ल्हाः दु ।

संविधानसभाया चुनाव गुलि सहज रुपं क्वचाःगु खः अथे यानाः हे न्हूगु संविधान तयार यायेगु ज्या नं खुरुखुरु जुजुं वंगु खःसा आः तकया दुने आपालं ज्या क्वचाये धुंकीगु खइ। तर न्हूगु संविधान तयार यायेगु व सत्ता चले यायेगु नितां ज्या थःपिनि हे नेतृत्वय् जुइमाःगु माग माओवादीं तयाच्वंगु दु। खः, संविधानसभाया खँ न्हापां माओवादीं हे हःगु खः। अथे धायेवं मेमेगु राजनीतिक पार्टीया थुकी छुं हे भूमिका मदु धइगु नं मखु। देशया तःधंगु राजनीतिक पार्टी जूगु ल्याखं माओवादीयाके गुगु जिम्मेवारी दयेमाःगु खः, आः मदयाच्वंगु पाय्छि खँ मखु। तर थःपिं थ्व ईया लागिं प्रतिपक्षय् हे च्वनाः सरकारयात ग्वाहालि याये धायेधुंकाः हाकनं सत्ता हे जक ताके याना जुइगु वा सत्ता बाहेक मेगु छुं हे चीज मखनीगु वातावरणं द्वन्द्वयात जक सःताच्वंगु महसुस जुयावःगु दु। छगू देशभक्त व इमान्दार पार्टीं सत्ताय् च्वनाः नं उलि हे जनताया सेवा यायेफु, सत्ताच्यूत जूसां जनताया मन त्याकेगु ज्या सतक संघर्षपाखें यायेफु। तर सत्तासीन जुइगु निंतिं हे जक आन्दोलन यायेगु खःसा नेपाली जनतायात उगु आन्दोलनं छु बिल वा बीगु खः धइगु न्ह्यसः नं ब्वलनेफु। सत्ता प्राप्त जुइवं निम्ह प्यम्ह राजनीतिक नेतात मन्त्री प्रधानमन्त्री जुइ। उमि हे जक स्वार्थ सिद्ध जुइ। तर आन्दोलनय् घाःपाः जूपिं,जेल नेल भोगे याःपिं राजनीतिक कार्यकर्तातय् धाःसा नये त्वनेगु निसें थीथी कथंया समस्या अथें हे लानाच्वंगु दइ। थौं झीगु देशय् जुयाच्वंगु नं थथे हे खः। न्हय्गू राजनीतिक दल व माओवादीया आन्दोलन लिपा देशय् गणतन्त्र स्थापना जुया माओवादीया नेतृत्वय् सरकार वल। उगु सरकारयात हिलाः आः एमालेया नेतृत्वय् मिलिजुली सरकार कायम जुयाच्वंगु दु। तर आः वयाः हाकनं राष्ट्रिय सरकारया नामय् थुगु सरकारयात नं क्वःथलेगु हे जक ज्या जुयाच्वंगु दु धाइ। तप्यंक धायेगु खःसा सत्ता केन्द्रित आन्दोलन जक जुयाच्वंगु दु। अथे जुइवं गुगुं नं देशया समस्यायात अःपुक समाधान याये फइ मखु। अझ देशय् न्हूगु संविधान दयेकेगु थेंज्याःगु दकलय् गहन व महत्वपूर्ण ज्या हे अन लाः थन लाः मदया वनाच्वंगु दु। देशय् दक्वसिया हित जुइमाः धइगु राजनीतिक पार्टीतय् सोच जुइमाः । थःपिनि दलया नेता व कार्यकर्ता अले सीमित मनूतय् जक हितया लागिं थन आन्दोलन व संघर्ष न्ह्यानाच्वन वा आम जनताया हित यायेगु लागिं संघर्ष जुयाच्वन, थ्व ति�याये मफुगु अवस्था जुयाच्वंगु दु। राजनीतिक पार्टीतय्सं याइगु संघर्ष, राजनीति आन्दोलन फुक्क हे आम जनताया हित सिबें नं सत्ताय् वनाः मोजमस्ती यायेगु ज्याय् जक सीमित जुयाच्वंगु हे कन्हय्या नेपाःप्रति शंका ब्वलंकीगु आधार जुयाच्वंगु दु ।

More Stories Like this