सिंगापुरय् धाथें जूगु छु खः ?

नेपाली कांग्रेसया सभापति गिरिजाप्रसाद कोइराला सिंगापुरय् वासः याकेत वनाच्वंगु इलय् अन हे एनेकपा (माओवादी) या अध्यक्ष प्रचण्डलिसे जूगु वार्ता धकाः पिहां वयाच्वंगु खँय् मतभेद पिदंगु दु। सिंगापुरं लिहां वयाखतं माओवादी अध्यक्ष प्रचण्डं आः देशय् याकनं हे सत्ता हिलीगु संकेत दु धयादीगु खःसा आः कोइराला लिहां वयेधुंकाः धाःसा प्रचण्डलिसे अज्याःगु खँ हे जूगु मदु धइगु खँ पिहां वयाच्वंगु दु। कोइराला नेपाः लिहां वयेसातकि वय्कःयात दकलय् न्हापां हे प्रधानमन्त्री माधव नेपालं छेँय् वनाः नापलासें सिंगापुरय् प्रचण्डलिसे जूगु वार्ताया व्यहोरा न्यनादीगु खः। उगु इलय् कोइरालां सरकार हिलेगु खँ जूगु मदु धयादीगु खँ सार्वजनिक जुयाच्वंगु दु। थुकिं यानाः सिंगापुरय् कोइराला व प्रचण्ड दथुइ धाथें जूगु खँ छु खः, उमि दथुइ गज्याःगु सहमति कायम जुल धइगु खँ आः रहस्यया गर्भय् दुसू वंगु दु। धाथेंया खँ सार्वजनिक मयायेत जक उगु भेटय् दुथ्याःपिं नेतातय्सं चाःचाःहीकाः खँ ल्हानाच्वंगु खःसा उकी छुं धायेथाय् मदु। अथे मखुसें राजनीतिक समीकरणयात ध्यानय् तयाः धाथें मखु मखुगु खँ प्रचारयानाच्वंगु जूसा थुकिं सहमति दयेकीगु मखु कि दयेधुंकूगु सहमतिया वातारण नं स्यंकेगु ज्या याना बी। उकिं थुकियात कयाः म्वाः मदुगु खँ अप्वः पिहां वने न्ह्यः हे खुलस्त यायेमाःगु आवश्यकता दु। थ्व धइगु थवंथवय् जक मखु देय्या जनतायात नं गुमराहलय् तयेगु ज्या खः। नेपाःया राजनीति आः थुलि फोहोर जुइधुंकल कि निम्ह नेता च्वनाः जूगु गोप्य वार्ताया विवरण तकं निम्हेस्यां निगू हे बीगु याना हयेधुंकल। आः भविष्यया लागिं जकसां सिंगापुर वार्ताया यथार्थ पिहां वयेमाः ।

More Stories Like this