पौभाः दुने प्रयोग

पौभाः नेपाःया परम्परागत किपा खः। तर मय्जु भावना पुं थुकियात आधुनिक स्वरुप बीगु कुतः यानादीगु दु। परम्परागत पौभालय् द्यःया रुप दइ तर उकिया ब्याख्या दइ मखु। भावनां पुं आः द्यःया नापनापं थौंया सन्दर्भय् उकिया ब्याख्या जुयाच्वंगु अन्य किपा नं च्वयाः पौभाः कलाय् छगू न्हूगु प्रयोग यानादीगु दु ।

गथे, वय्कलं मैत्री बुद्धया किपा च्वयादिल अले उकिया नापनापं न्युयोर्कय् जूगु हवाई आक्रमण, नेपाः लगायतया देशय् जुयाच्वंगु लुटपात, भेदभाव, शोषणया किपात नं स्वाना बिल। उकिया अर्थ खः, संसारय् मैत्री मदुगुलिं हे थ्व आक्रमण व अपराधया ज्या जुयाच्वंगु दु ।

अथे हे वय्कलं लक्ष्मीया किपा च्वयादिल, अले उकिया चाकःछिं नेवाः मिस्तय्त इहि यानाच्वंगु, बार्‍हाः पिकयाच्वंगु व मनूलिसे इहिपा यानाच्वंगु किपा नं तनादिल। थुकिया बारे वय्कःया तर्क दु, बेल धइगु नारायण खः, वयालिसे इहिपा याःम्ह जूगुलिं मिसा लक्ष्मी जुल। अले व मिसालिसे इहिपा याइम्ह मिजंयात नारायण धयातल। वास्तवय् मिसा लक्ष्मी जूगु कारणं हे वलिसे इहिपा याइम्ह मिजं नारायण (ज्वाइँ नारायण) जुइखंगु खः ।

नेवाः संस्कृतिइ मिसा मस्तय् यक्व हे थाय् दु। थथे जूगुया कारण मिसायात झीसं लक्ष्मी कथं माने याना तयागुलिं नं खः धयागु वय्कःया दावी दु ।

वय्कलं थज्याःगु हे अर्थ बीगु कथंया पौभाः आः तक ३१ पाः च्वयादी धुंकूगु दु। आः याकनं हे थुकिया छगू सार्वजनिक प्रदर्शनी यानाः फुकसिया न्ह्यःने थःगु प्रयोग ब्वयेगु तयारी नं यानाच्वनादीगु दु ।

पौभाः कलाय् यानादीगु थ्व प्रयोगयात वय्कलं 'पौभाः�कम�कल्चर' धकाः नां बियादीगु दु।
सामान्यतया पौभाः धायेबलय् उकी मात्र द्यःया किपा जक दइ। तर झीगु व्यवहारिक जीवन व वर्तमान विश्वय् उम्ह द्यःया छु महत्व दु धइगु खँ धाःसा उकी प्रस्ट जुइ मखु। पौभाः दुने दइम्ह उम्ह द्यःयात थौंया सन्दर्भयात ल्वय्क अर्थ बीगु वय्कःया कुतः खः। धयादी, 'मसिउ, थ्व प्रयोगयात मनूतय्सं गुलि ययेकीगु खः थें ।'

वय्कःया किपाय् मात्र प्रयोग जक नं मदु। प्रत्येक किपा कलाया ल्याखं नं ज्वलन्त जू। उकिया अर्थं नेवाः विशेषता ब्वयेत सनाच्वंगु प्रस्ट सी दु। पौभाःया द्यःयात नेवाः संस्कृतिया बः कयाः अर्थ बियादीगुलिं नं अथे जूगु खयेफु।
कलाकार भावना पुंजुं पौभाः च्वयेगु कला ला थः हे अबु प्रेममान पुंपाखें सयेकादीगु खः। अथे खःसां थः श्रीमान नं मूर्तिया कलाकार जूगुलिं वय्कःयात थःगु कला च्वन्ह्याकेत उलि थाकु धाःसा मजुल। कला मार्फत हे नेवाः भाय्, नेवाः संस्कृति च्वन्ह्याकेगु वय्कःया दुनुगःया इच्छा खः ।

More Stories Like this