वाया दुने जाकि दु

नर्मदेश्वर प्रधान

वल वल फसिक्वाः। छिकपिंसं धयादी। ख नं खः। जिं हानं वहे खँ ल्हाये। वय्कःया बारे खँ न्ह्याके। उखुन्हु वय्कःया बारे च्वयागु खः। च्वया। पिकया। तर जितः छुं धाये मानि थें। मगाःमचाः थें जुयाबी। धायेगु ल्यं दनि थें। त्वःफिउ थें जुइ। उकिं वय्कःया बारे हे खँ स्वाके। मतिइ दुगु छता निता खँ पिल्ह्वये ।

वय्कःया उसाँय्या बारे जिं चर्चा यानागु खः। धाधां वय्कः सिंगापुरय् थ्यनी। उपचारया निंतिं। थथे विदेशय् उपचार यायेत डाक्टरतय्सं सिफारिस यायेमाः। देशय् उपचार सम्भव मजू। विदेशय् यंके माल। उपचारय् संलग्न डाक्टरतय्सं धायेमाः। अले रोगीयात सुविधा दुगु देशय् यंकी। तर थुगुसी खँ पाइ। सिफारिसकर्तातय्सं स्पष्ट याइ। वय्कःया देश दुने हे उपचार जुइफु। विदेशय् यंकेमाःगु कारण मदु। गंगालाल अस्पतालया डाक्टरतय्सं छप्वाः म्हुतुं धाइ। औपचारिक कथं सिफारिस बीत तयार जुइ मखु। पारिवारिक निर्णय कथं वय्कःयात गनं हे नं यंकेफु। डाक्टरतय्सं धाइ। वय्कःया म्ह्याय् नं डाक्टरतय्त दवाव बी। सिंगापुरय् यंकेमाः। उपचारया निंतिं। डाक्टरतय्के सिफारिस फ्वनी। डाक्टरतय्सं गुगु नं हालतय् सिफारिस मबीगु निर्णय याइ। म्ह्याय् मय्जुया न्ह्यपु चाःहिली। अबुयात सिंगापुरय् यंके हे माः। अन स्वास्थ्यया विशेष परीक्षण याके हे माः। म्ह्याय् नं क्वःछी। ख नं अबुया राजनीतिक उपचार याइम्ह ला थौंकन्हय् म्ह्याय् खः। अबुया राजनीतिक ल्वय्या निगरानी तइम्ह, माःगु वासः बीम्ह म्ह्याय् मय्जु हे जुइ। म्ह्याय् मय्जुया सिफारिसय् वय्कःयात सिंगापुरय् यंकी। सिंगापुरं एम्बुलेन्स हवाई जहाज हइ। आकसय् ब्वब्वं ल्वय् तच्वःसा हवाई जहाजय् तत्काल उपचार जुइ फइ। थज्याःगु सुविधा वय्कःयात चूलाइ। धुक्क जुइ। वय्कः सिंगापुरय् वनी। अस्पतालय् भर्ना जुइ। खतुं वय्कःया उसाँय् उलि तच्वःगु मखु जुइमाः। थन हे उपचार जुइफु। डाक्टरतय्सं उकिं हे धाःगु जुइमाः। वय्कलं नं थःत तच्वःगु ल्वय् जूगु मताः। काठमाडौंया अस्पतालय् वय्कलं धाइ 'जितः खास छुं जूगु मदु। संविधान मदयेकुसे जि सी मखुनि, छिकपिं धुक्क जुयादिसँ।' थःगु ल्वय् खतरापूर्ण मजू। वय्कलं बांलाक सिउ। 'जिगु म्हं मफुगु खँयात कयाः पिने छु छु हल्ला जुयाच्वंगु दु?' पत्रकारतलिसे वय्कलं जिज्ञासा तइ। मानौ हल्ला यायेत वय्कः अस्पतालय् च्वं वःगु खः। शंका याये मास्ते वइ।
वय्कः उपचारया निंतिं सिंगापुरय् वनी। वय्कःया ल्वय् उलि जोखिमपूर्ण मखु। उकिं हे मखा वय्कःया स्वास्थ्य लाभया निंतिं गनं गुगुं वक्तव्य पिहां मवः। गनं प्रार्थना सभा मजू। थ्व खँय् मनूत चिन्तित खने मदु। वय्कःया ल्वय् चिन्ताजनक मखु। सकस्यां सिउ जुइमाः। छुं जुइत्यंसा मखा चिन्ता काइ। व छुं हे मजूम्ह। संविधान मदयेकुसे सी मखुनि। पक्काम्ह। मनोबलं जाःम्ह वय्कःयात कयाः म्वायेक म्वायेक सुनां छाय् चिन्ता प्वंका जुइ ।

माओवादीया नेता भाजु प्रचण्ड नं सिंगापुरय् वनी। अस्पतालय् च्वंम्ह गिरिजाप्रसाद कोइराला नाप लाइ। गिरिजाया ल्वय् उपचार शारीरिक मखु। राजनीतिक खः। मनूतय्सं धया हइ 'सिंगापुर भ्रमणया हेतु शारीरिक उपचार मखु।' हुइनाभुइना ताये दइ। प्रचण्डजुं सिंगापुरय् अस्पतालय् च्वंम्ह गिरिजा नाप लाइ। खँल्हाबल्हा जुइ। खँ छु जुल सीदइ मखु। याकनं हे देशय् जुयाच्वंगु गतिरोध अन्त्य जुइ। गिरिजा देशय् लिहां वल कि निर्णायक भूमिका म्हिती। व्यापक हल्ला जुइ। गिरिजा व भाजु प्रचण्ड दथुइ थ्व खँय् उपाय लुइधुंकूगु दु। गिरिजा लिहां वल कि फुक्क सुथां लाइ। गुलिसिनं विश्वास याइ ।

गुलिसिनं धाइ 'पिने जक सिंगापुर खः थ्व। यथार्थय् थ्व दिल्ली हे खः।' दिल्ली धाल कि तप्यंक दिल्लीया अर्थ जुइ। दिल्ली छद्म भेषय् खनेदइ। सिंगापुर जुयाः लुइ। थ्व फुक्क योजना दिल्लीवालातय्गु हे खः। एसडी मुनिया नां कया हइ। थौंकन्हय् सिंगापुरय् ज्या यानाच्वंम्ह प्रा. मुनियात नेपाल विषयया विशेषज्ञ व योजनाकार धाइ। वय्कःया सहजकर्ताय् गिरिजाया सिंगापुरय् स्वास्थ्य परीक्षणया ज्याझ्वः क्वःजी। भाजु प्रचण्ड सिंगापुरय् गिरिजा स्वःवंगु खः। तर्क पिहां वइ। गुलिसिनं धाइ 'भाजु प्रचण्ड सिंगापुरय् थःगु हे ज्याय् वंगु खः। गिरिजायात अस्पतालय् नापलायेगु शिष्टाचार ज्याझ्वः जक खः। राजनीतिक भेटघाट मखु।' गुलिसिनं हानं तर्क याइ 'सिंगापुरया अस्पतालय् भाजु प्रचण्डयात भाजु गिरिजां न्हाय्पनय् स्वांपुयाः धाइ� 'वाया दुने जाकि दु।' थ्व हे स्वांपूगुया तरंग काठमाडौंया राजनीतिक वृत्तय् तीव्र खनेदइ। गुलिसिनं धाइ 'छुं न छुं महत्वपूर्ण खँ जूगु दु। अथें स्वां पुइला?' हानं गुलिसिनं धाइ 'स्वां पूगु ला भाजु गिरिजां थःगु भाः थकायेत जक खः।' धाःगु ला आखिर 'वाया दुने जाकि दु' हे ला खःनि। थीथी अनुमान खने दइ। ... ... कुतुं वइ ला नये आस याइपिं नं दइ ।

गिरिजाप्रसादया सिंगापुरय् जूगु उपचार खर्च फुक्क नेपाल सरकारं पुलीगु जुल। मन्त्रिमण्डलं पास जुल। करौंडौं दां चीकल। खबरय् वइ। विदेशय् उपचार यायेत डाक्टरतय् सिफारिस माः। अले तिनि व वैध जुइ। गुगुं आर्थिक सहयोगया औचित्यता दयेमाः। तर पारिवारिक निर्णय कथं सिंगापुरय् उपचार जुइ। अखबारय् वइ ।

सिंगापुरय् सुजाताया चरम विलासिताया बुखँ वइ। न्हिछिया लखंलख खर्चवया होटल व मोटरया लागि वनी। नेपाल सरकारं फुक्क पुलेमाली। प्रम माधवकुमार नेपालयात फसाद। छुं धाये। गिरिजां मन्त्रिमण्डल हीका बीगु ख्याच्वः बी। सौदावाजी याइ। राजनैतिक वृत्तय् गिरिजा थौं सुपरम्यान। वयात सुनां थी फइ ।

राज्यमन्त्री करिना बेगमं छुं दिं न्ह्यः पर्साया प्रमुख जिल्ला अधिकारीयात न्यतालय् दाया बिल। बेगमया आलोचना जुइ। कार्यालयय् सरकारी कर्मचारीयात ल्हाः वाये मजिउ। वाइ। कर्मचारीवर्गं विरोध याइ। असन्तोष प्वंकी। उपप्रधानमन्त्री सुजातां नं थःगु विलासीताया निंतिं सुयातं ल्हाः वाःगु। मुड्कीं छ्यानाच्वंगु दु। झीत थ्व खँ परोक्ष कथं अनुभव जुइ। नेपाःया सार्वजनिक, आर्थिक, धुकूया न्यतालय् सुजातां चड्कन बी। लाकमं च्वाइ। माक्व ध्यबा स्वाहायेकी। ख्याच्वः बी। बेगमया हातपात स्वयाः सुजाताया चड्कन म्हो अपराधवोधक मखु। तर थुकिया विरोध याइम्ह सु ?

narapradhan@yahoo.com

More Stories Like this