जनजातिपाखें वःगु विद्रोहया ख्याच्वः

यदि आत्मनिर्णयया अधिकार, जनजातिं फ्वनाच्वंगु थेंज्याःगु अधिकार मदयेक संविधान पित धाःसा उकियात थःपिंसं बहिष्कार यानाः अज्याःगु संविधान विरुद्ध विद्रोह यायेगु धकाः आदिवासी जनजातितय्सं ख्याच्वः बिउगु दु। नकतिनि च्वंगु आदिवासी जनजातितय्गु छगू तःधंगु भेलां थ्व खँ निर्णय यासें अज्याःगु अवस्थाय् संघर्षय् कुहां वये मालेफु धकाः छगू संघर्ष समिति नापं गठन यायेधुंकूगु दु। यदि जनजातिं माग यानाच्वंगु खँ संविधानय् दुमथ्याकल धाःसा थुकिं जनजाति आन्दोलन ब्वलंकीगु स्पष्ट संकेत थुकिं बिउगु दु ।

संविधानप्रति जनतां गज्याःगु आकांक्षा तयाच्वंगु दु धइगु खँ थुकिं नं क्यनाच्वंगु दु। संविधान दयेकेगु ज्याय् पटक्क हे ध्यान मबिसे सरकार गठन व विघटनय् केन्द्रित जुयाच्वंपिं पार्टीया नेतातय्त थ्व ख्याच्वलं बिचाः यायेत बाध्य यानाच्वंगु दु। जनजातिं थज्याःगु माग व दावी यायेगु उचित नं खः। छाय्धाःसां देशय् राज्य पुनर्संरचनाया खँ हःगु हे जनजातिया लागिं खः। जनजातियात उमिसं माग यानाच्वं थेंज्याःगु अधिकार बीगु खःसा नेपाःयात संघीय स्वरुपय् यंकेमाः धइगु बिचाः वःगु खः। संघीय नेपाःया आवश्यकता हे नेपाःया फुक्क लागाय् च्वंपिं जनजातियात अधिकार सम्पन्न यायेत जूगु खः। तर आः वयाः वहे जनजातियात अधिकारं विमुख यानाः संविधान दयेकल धाःसा अज्याःगु संविधानया विरोधय् समग्र जनजातित दना वइगु स्वाभाविक खः, दना वये नं माः। न्ह्यागुसां बांमलाःगु संविधान हल धाःसा उकिया विरुद्ध कडा रुपं पलाः ल्ह्वने धाःगु कारणं संविधान दयेकीपिं सभासद्त व उमिगु पार्टीतय्सं गम्भीर जुयाः बिचाः याये माः ।

More Stories Like this