न्ह्याथे यानाः नं बजेट पास

सभासद्तय्त अनिवार्य उपस्थित जुइत ह्वीप

येँ (सन्ध्या टाइम्स)/न्ह्यागु यानाः जूसां स्वन्हुया दुने बजेट पारित यायेगु निर्णय सत्तारुढ दलतय्सं याःगु दु।
माओवादीं स्वन्हुया निंतिं सदन चायेके बीगु निर्णय यायेवं प्रधानमन्त्री माधव नेपालं थःगु निवासय् थौं सःतादीगु सत्तारुढ दलतय् मंकाः बैठकं उगु निर्णय याःगु खः। अथे हे बैठकं बजेट पारित यायेगु निंतिं सक्रिय भूमिका म्हितेगु निर्णय नं याःगु दु। माओवादीं थनिंनिसें स्वन्हु तक सदन चले याके बीत्यंगु खः ।

बैठकं थःथःगु दलया सभासदतय्त बजेट शेसनय् अनिवार्य उपस्थित जुइत ह्वीप जारी यायेगु निर्णय नं याःगु दु।
विनियोजित बजेटयात कयाः जुइगु सहलह ज्याझ्वलय् सक्रिय भूमिका म्हितेगु निर्णय नं याःगु दु। थुकिया निंतिं बजेटया सहलहय् थः सभासद्तय्त सक्रिय सहभागी जुइत निर्देशन बीगु जूगु दु ।

ताः इलंनिसें सरकार व माओवादी दथुइ सहमति जुइ मफयाः अवरुद्ध जुयाच्वंगु सदन बजेट पारित याकेगु निंतिं माओवादीं स्वन्हु तक चायेके बीगु जुइवं थौं सत्तारुढ २२ दलया बैठक च्वंगु खः ।

थनिंनिसें न्ह्याइगु सदनय् झिंखुगू मन्त्रालयया विनियोजित बजेटयात कयाः सहलह जुइ। मन्त्रालयया विषयगत बजेटय् सहलह यायेगु निंतिं थौं १० बजे तकया दुने नां दर्ता यायेत ई क्वःछिनातःगु दु ।

साउन १९ गते सदनय् बजेट पेस याःगु इलय् झिंगुन्हु तक थीथी मन्त्रालयया विषयगत शिर्षकय् सहलह यायेगु ई क्वःछिना तःगु खःसा आः स्वन्हुया दुने हे फुक्कं मन्त्रालयया विनियोजित बजेटय् सहलह यानाः क्वचायेकेगु कथं सत्तारुढ दलतय्सं तयारी यानाच्वंगु खँ सीदुगु दु। बजेटयात कयाः थौं व कन्हय् सहलह यायेगु ज्याझ्वः दु ।

थीथी मन्त्रालयया विनियोजित बजेटयात कयाः ब्वलंगु न्ह्यसःयात प्रधानमन्त्री लिसें थीथी मन्त्रीतय्सं कन्हय् लिसः बीगु कथं कार्यतालिका दयेकातःगु दु ।

तर माओवादीं धाःसा सदनय् थःपिं बजेट बैठकय् उपस्थित मजुइगु निर्णय याःगु दु ।

सदन न्ह्यायेवं माओवादीं ध्यानाकर्षण यासें थःपिनि धापू तयाः छम्ह निम्ह जक सभासद् च्वनाः मेपिंसं बैठक बहिष्कार यानाः पिहां वयेगु रणनीति दयेकातःगु दु। बजेट पेश याःगु इलय् नं माओवादीं थथे हे याःगु खः ।