कन्हय्निसें स्वन्हु सदन चाली
तर माओवादीं धाःसा सदन बहिष्कार याइगु
येँ (सन्ध्या टाइम्स)/ताः इलंनिसें नागरिक सर्वोच्चाताया माग यासें सदन अवरुद्ध याना वयाच्वंगु माओवादीं कन्हय् निसें स्वन्हुया निंतिं सदन चायेके बीगु जूगु दु ।
माओवादीया थौं सुथय् च्वंगु संसदीय दलया बैठकं उगु निर्णय याःगु खः। निर्णय कथं कन्हय्निसें थ्वहे वइगु बुधवाः तक सदन चायेके बीगु जुइ ।
माओवादीं बजेट पारित याकेगु निंतिं सदन चले याके बिउसां उगु बजेट पेश याइगु सदनया बैठक धाःसा थःपिंसं बहिष्कार याइगु जूगु दु। सदनय् बजेट पेश यायेवं थःपिंसं न्हापा थें हे नाराबाजी यानाः सदन बहिष्कार यानाः पिहां वनेगु रणनीति माओवादीं धाःगु दु ।
थौं सुथय् संसदीय दलया बैठक लिपा पत्रकारतलिसे खँ ल्हासें माओवादीया उपाध्यक्ष नारायणकाजी श्रेष्ठ (प्रकाशं) थःपिंसं बजेट पारित यायेगु न्हि कुन्हु सदन बहिष्कार यायेगु जानकारी बियादिल ।
वय्कलं संसदीय दलया बैठकय् बजेट पारित यायेगु ज्याय् अवरोध मयायेत निर्देशन बिउगु खँ नं कनादिल।
माओवादीं सरकारया बजेट पारित याकूसां थःपिंसं उगु बजेटयात स्वीकार धाःसा मयायेगु खँ नं धाःगु दु।
माओवादीं नागरिक सर्वोच्चताया माग यासें साउन १९ गते निसें बजेट तकं पारित मयाकुसे सदन अवरुद्ध याना वयाच्वंगु खः। आर्थिक दँ २०६६/०६७ या बजेट पारित मजूगुलिं सरकारयात खर्च यायेत तकं ध्यबा मदयाः समस्या जुइवं माओवादीया म्हिगः च्वंगु केन्द्रीय समितिया बैठकं बजेट पारित याके बीगु निर्णय याःगु खः ।
थ्वहे झ्वलय् व्यवस्थापिका संसदया थौं च्वने धाःगु बैठक स्थगित याःगु दु। माओवादीं कन्हय्निसें सदन चायेके बीगु निर्णय यायेवं कार्यव्यवस्था समितिं थौंया बैठक स्थगित याःगु खः ।
सदन चालीगु जुइवं कार्यव्यवस्था समितिया बैठकं कन्हय् सदनय् सहलह यायेगु विषयवस्तुया कार्यसूची दयेकेगु ज्या यानाच्वंगु दु। समितिं न्हापा दयेकातःगु कार्यतालिका हिलाः आः बजेटयात कार्यसूचीइ तःगु दु ।
बजेट पारित याकेगु नियमित ज्या न्ह्याकेगु लागिं नं कम से कम निन्हुया ई मदयेक मगाः। थ्व प्रक्रिया पूवंकेगु लागिं हे माओवादीं स्वन्हुया ई सरकारयात बिउगु खः ।
