बजेट पारित याके बीगु बांलाःगु पलाः

माओवादीतय्सं आः वयाः मेगु मखुसां देशय् थानाच्वंगु बजेट छगू चाहिं पारित याके बीगु धकाः सहमति कायम याःगु दु। संसद अवरुद्ध जुयाच्वंगु कारणं बजेट हे पारित याये मफयाः तःधंगु संकट पिहां वइगु अवस्था वयाच्वंगु खःसा आः माओवादीं बजेट छगू पारित याकेगु लागिं सदन चले याके बीगु जुल धकाः याःगु सहमतिपाखें सरकारयात तःधंगु राहत हे चूलात जुइमाः ।

बजेट पारित याके बीगु थ्व निर्णयपाखें माओवादीं थःपिं देय्या जिम्मेवार पार्टी खः धकाः क्यना बिउगु दु। छाय्धाःसां बजेट पारित मजुल धाःसा देय्या हे आर्थिक अवस्था हे डाँवाडोल जुइफु धइगु खँ पिहां वःगु कारणं देशय् थज्याःगु अवस्था मवयेकेगु लागिं माओवादीं बजेट पारित याके बीत्यंगु खः। बजेट मवल धाःसा सरकारयात सिबें नं सरकारी निकायय् ज्या याइपिं कर्मचारी व उमि परिवारयात मर्का जुइगु जूगुलिं उकियात ध्यानय् तयाः माओवादीं बजेटयात पारित याके बीत्यंगु खः। माओवादीं देशया अवस्थायात ध्यानय् तयाः क्यंगु थ्व सदासयतायात सरकारं बांलाक थुइकेमाःगु आवश्यकता दु। देशया अवस्थायात ध्यानय् तयाः माओवादीं थःगु अडानयात छुं भचा लचक याः थें आः सरकारं नं थःपिनि अडानयात छुं भचा लचक यानाः समस्याया समाधान पिकायेगु ज्या यायेमाः। माओवादीं राष्ट्रपतिया पलाःयात कयाः गुगु खँ हयाच्वंगु खः उकियात कयाः आः सरकारं नं बिचाः यानाः थःपिनि समाधान पिकायेगु ज्या यायेमाः। थ्व इलय् अडान धकाः जक हालाच्वन धाःसा छुं हे विषयय् निकास पिहां वइ मखु व थुकिं देय्यात अन्ततः झ्वाकलय् थुनेगु ज्या याना बी ।

More Stories Like this